شىمكەنتتە مۇعالٸم وقۋشىنى ۇرعانى ٷشٸن 25 تەۋلٸككە قاماۋعا الىندى. بۇل تۋرالى قالالىق سوتتىڭ باسپاسٶز قىزمەتٸ مەلٸمدەدٸ, دەپ حابارلايدى Dalanews.kz.
وقيعا بيىل ناۋرىز ايىندا ليتسەي-مەكتەپتەردٸڭ بٸرٸندە بولعان. ساباق ٶتٸپ جاتقان كەزدە مۇعالٸم ەسٸكتٸ قاتتى قاققان وقۋشىعا بٸرنەشە رەت قول كٶتەرگەن. بۇل سەت وقۋ ورنىندا ورناتىلعان بەينەباقىلاۋ كامەراسىنا تٷسٸپ قالعان.
ايىپتالۋشى ٶز كٸنەسٸن مويىنداپ, سوتتان بوستاندىعىنان ايىرمايتىن جەڭٸل جازا تاعايىنداۋدى سۇراعان.
الايدا سوت ەر ادامدى قر قىلمىستىق كودەكسٸنٸڭ 109-1-بابى بويىنشا ("كەمەلەتكە تولماعانعا ەدەيٸ جەڭٸل دەنە جاراقاتىن كەلتٸرمەي, دەنە اۋىرتپالىعىن سالۋ") كٸنەلٸ دەپ تانىپ, 25 تەۋلٸككە قاماۋ جازاسىن كەستٸ.
سوت ٷكٸمٸ ەزٸرگە زاڭدى كٷشٸنە ەنگەن جوق.
ەسكە سالايىق, بۇعان دەيٸن الماتىداعى نازارباەۆ زيياتكەرلٸك مەكتەبٸندە 11-سىنىپ وقۋشىسىنىڭ وقۋدان شىعارىلۋى قوعامدا قىزۋ پٸكٸرتالاس تۋدىرعان ەدٸ. 23 مامىردا مەكتەپ ەكٸمشٸلٸگٸ جاسٶسپٸرٸمدٸ تەرتٸپ ەرەجەسٸن بۇزدى دەپ وقۋدان شىعارعان. كەيٸننەن وقۋشى ۆيدەوٷندەۋ جاساپ, كٸنەسٸن مويىنداپ, كەشٸرٸم سۇرادى.
مەكتەپ ۇسىنعان مەلٸمەتكە سەيكەس, قورىتىندى باعالاۋ كەزٸندە وقۋشى تەلەفون قولدانعان, مۇعالٸم ەسكەرتۋ جاساعاندا, ۇستازعا بالاعات سٶز ايتقان. وسى وقيعادان كەيٸن مەسەلە تەرتٸپتٸك كەڭەستە قارالىپ, وقۋشىنى مەكتەپتەن شىعارۋ تۋرالى شەشٸم قابىلدانعان.
جاسٶسپٸرٸم جارييالاعان بەينەٷندەۋدە ٶز ەرەكەتٸنە ٶكٸنٸش بٸلدٸرٸپ, بٸرنەشە رەت كەشٸرٸم سۇراعانىن ايتادى. ول وقۋىن سول مەكتەپتە جالعاستىرۋعا مٷمكٸندٸك بەرۋدٸ سۇراپ, قاجەت بولسا, قوعامدىق جۇمىسقا تارتىلۋعا نەمەسە ٶزگە تەرتٸپتٸك شارالارعا دايىن ەكەنٸن مەلٸمدەگەن. سونىمەن بٸرگە, مۇعالٸمدەر مەن اتا-انالار تاراپىنان ٶزٸنە قاتىستى جالعان اقپارات تارالعانىن جەتكٸزدٸ.
"ەگەر ماعان وسى مەكتەپتە وقۋىمدى جالعاستىرۋعا مٷمكٸندٸك بەرٸلسە, تەرتٸپتٸك جازاعا دا, قوعامدىق جۇمىسقا دا دايىنمىن", – دەدٸ ول بەينەٷندەۋٸندە.
وقۋشىنىڭ جاعدايى ۋشىعىپ كەتكەن سوڭ, قوعام بەلسەندٸسٸ ايدا بۋكاەۆا ونىڭ دەنساۋلىعى كٷرت ناشارلاعانىن حابارلادى. ونىڭ ايتۋىنشا, جاسٶسپٸرٸم بٸرنەشە كٷن تاماق ٸشپەي, جٷيكە جٷيەسٸ سىر بەرگەن, تٸپتٸ جەدەل جەردەممەن اۋرۋحاناعا جەتكٸزٸلگەن.
