Shymkentte dárigerler ókpesiniń 90 paiyzy qabynǵan jańa bosanǵan áieldi aman alyp qaldy
Túsken kezdegi jaǵdaiy óte aýyr bolǵan, ári ózdiginen demala almaǵan naýqasty dárigerler jansaqtaý bólimindegi ókpeni jasandy jeldetý apparatyna qosqan.
Kompiýterlik tomografiia nátijesinde naýqas ókpesiniń 90 % zaqymdalyp, eki jaqty pnevmoniia ekeni anyqtaldy. Buǵan qosa PTsR saraptamasy boiynsha jańa bosanǵan áielde Covid-19 virýsy bar ekeni belgili bolady.
Naýqasta tynys jetispeýshiliginiń 3-dárejesi, aiqyn intoksikatsiialyq sindromy, trombatsittiń tómen bolýy syndy asqynýlar bolǵan. 1982 jylǵy áielge dárigerler hattama boiynsha tolyq em kórsetip, antikoagýliantty jáne antibakterildyq terapiia boiynsha kómek kórsetedi.
«Naýqastyń qazirgi jaǵdaiy jaqsy. Ózdigimen tynys alýda. Tynys alý jiiligi jaqsarǵan. Qandaǵy ottegi mólsheri 98 %-dy quraidy. Qaita jasalǵan kompiýterlik tomografiia qorytyndysy ókpe qabynýynyń 30 %-ǵa azaiǵanyn kórsetti», - deidi qalalyq juqpaly aýrýlar ortalyǵynyń akýsherlik bólimine jaýapty dáriger anesteziolog-reanimatolog Aijan Beisengirova.
Qalalyq densaýlyq saqtaý basqarmasynyń mamandary búginde azamatshanyń densaýlyǵy jaqsaryp, 29 jeltoqsan kúni aýrýhanadan shyqqanyn habarlady.
Qosymsha suraqtar boiynsha tegin 109 biryńǵai bailanys nómirine habarlasýǵa bolady.
Shymkent qalasy ákimdiginiń baspasóz qyzmeti
