Shymkenttegi qaiǵyly jaǵdaidan keiin birneshe sheneýnikke tártiptik jaza qoldanyldy, dep habarlaidy Dalanews.kz.
12 sáýirde Shymkent qalasynyń Qarataý aýdanyna qarasty Turan shaǵynaýdanynda alty jasar bala sýǵa toly shuńqyrǵa qulap, kóz jumdy. Qaiǵyly jaǵdai №10 kóshede bolǵan.
Osyǵan bailanysty qala ákimdigi birqatar laýazymdy tulǵaǵa tártiptik sharalar qabyldady. Shymkent ákiminiń turǵyn úi-kommýnaldyq sharýashylyǵy men infraqurylym salasyna jetekshilik etetin orynbasaryna sógis jariialandy. Al energetika jáne infraqurylymdyq damý basqarmasynyń basshysyna qatań sógis berildi. Qarataý aýdanynyń ákimi Rahmanbek Múlkemanov qyzmetinen bosatyldy.
Ákimdik málimetinshe, Múlkemanovtyń qyzmetinen ketýine buǵan deiingi jumysta ketken kemshilikter men osy qaiǵyly oqiǵa sebep bolǵan. Bul jaǵdai kadrlyq sheshim qabyldaýdaǵy sońǵy túrtki boldy dep kórsetilgen.
Abattandyrý men aýmaqty kútip-ustaýǵa jaýapty merdiger uiymdardyń basshylaryna qatysty tergeý júrip jatyr. Tergeý aiaqtalǵan soń is materialdary sotqa joldanady.
Aita keteiik, 12 sáýirde Turan-1 shaǵynaýdanynda birinshi synyp oqýshysy keshki saǵat 17:00 shamasynda serýenge shyǵyp, úiine oralmaǵan. Ata-anasy dereý izdeý jumystaryn bastap, balanyń denesi sol kúni saǵat 22:00 shamasynda tereńdigi shamamen eki metr bolatyn sýǵa tolǵan shuńqyrdan tabylǵan.
Qazirgi tańda sot-meditsinalyq saraptama men tekseris júrgizilip jatyr.
