Shymkentte aliment qaryzy tórt million teńgege jetken turǵyn alty aiǵa bas bostandyǵynan aiyryldy, dep habarlaidy Dalanews.kz agenttigi Otyrar.kz saityna silteme jasap.
Qalalyq prokýratýranyń málimetinshe, boryshker Qarataý aýdanynda turady. Ol Qylmystyq kodekstiń 139-baby — «Balalardy asyraýǵa arnalǵan qarajatty tóleý jónindegi mindetterdi oryndamaý, sondai-aq eńbekke jaramsyz ata-anany nemese jubaiyn (zaiybyn) kútip-baǵýdan jaltarý» boiynsha jaýapkershilikke tartylǵan.
Prokýratýranyń dereginshe, biyldyń ózinde aliment tóleýden jaltarǵandarǵa qatysty osy bap boiynsha 38 is sotqa joldanyp, barlyǵyna úkim shyqqan. Bul respýblikadaǵy jalpy kórsetkishtiń shamamen 9 paiyzyn quraidy.
Quzyrly organnyń habarlaýynsha, alimentti ýaqytynda tólemeý eki jylǵa deiin bas bostandyǵynan aiyrý jazasyna ákep soǵýy múmkin.
Jyl basynan beri Shymkentte aliment tólemegeni úshin 324 adam ákimshilik jaýapkershilikke tartylǵan. Onyń 208-i ákimshilik qamaýǵa alynyp, qalǵandaryna aiyppul salynǵan.
Buǵan deiin prokýratýra 7 million teńgeden astam bereshegi bar taǵy bir boryshkerdiń de alty aiǵa sot úkimimen bas bostandyǵynan aiyrylǵanyn habarlaǵan edi.
