شىمكەنتتە اليمەنت قارىزى ءتورت ميلليون تەڭگەگە جەتكەن تۇرعىن التى ايعا باس بوستاندىعىنان ايىرىلدى، دەپ حابارلايدى Dalanews.kz اگەنتتىگى Otyrar.kz سايتىنا سىلتەمە جاساپ.
قالالىق پروكۋراتۋرانىڭ مالىمەتىنشە، بورىشكەر قاراتاۋ اۋدانىندا تۇرادى. ول قىلمىستىق كودەكستىڭ 139-بابى — «بالالاردى اسىراۋعا ارنالعان قاراجاتتى تولەۋ جونىندەگى مىندەتتەردى ورىنداماۋ، سونداي-اق ەڭبەككە جارامسىز اتا-انانى نەمەسە جۇبايىن (زايىبىن) كۇتىپ-باعۋدان جالتارۋ» بويىنشا جاۋاپكەرشىلىككە تارتىلعان.
پروكۋراتۋرانىڭ دەرەگىنشە، بيىلدىڭ وزىندە اليمەنت تولەۋدەن جالتارعاندارعا قاتىستى وسى باپ بويىنشا 38 ءىس سوتقا جولدانىپ، بارلىعىنا ۇكىم شىققان. بۇل رەسپۋبليكاداعى جالپى كورسەتكىشتىڭ شامامەن 9 پايىزىن قۇرايدى.
قۇزىرلى ورگاننىڭ حابارلاۋىنشا، اليمەنتتى ۋاقىتىندا تولەمەۋ ەكى جىلعا دەيىن باس بوستاندىعىنان ايىرۋ جازاسىنا اكەپ سوعۋى مۇمكىن.
جىل باسىنان بەرى شىمكەنتتە اليمەنت تولەمەگەنى ءۇشىن 324 ادام اكىمشىلىك جاۋاپكەرشىلىككە تارتىلعان. ونىڭ 208ء-ى اكىمشىلىك قاماۋعا الىنىپ، قالعاندارىنا ايىپپۇل سالىنعان.
بۇعان دەيىن پروكۋراتۋرا 7 ميلليون تەڭگەدەن استام بەرەشەگى بار تاعى ءبىر بورىشكەردىڭ دە التى ايعا سوت ۇكىمىمەن باس بوستاندىعىنان ايىرىلعانىن حابارلاعان ەدى.
