«Agrarlyq nesie korporatsiiasy» AQ (ANK) basqarma tóraǵasynyń burynǵy orynbasary Shymkentte segiz jylǵa sottaldy, dep habarlaidy Dalanews.kz Bas prokýratýranyń baspasóz qyzmetine siltep.
«2025 jylǵy 7 tamyzda Shymkent qalasynyń qylmystyq ister jónindegi mejraiondyq sotynyń úkimimen ANK basqarma tóraǵasynyń eks-orynbasary I.M. men merdiger uiymnyń direktory S.R. segiz jylǵa bas bostandyǵynan aiyrý jazasyna kesildi, múlki tárkilendi», – delingen sársenbi kúngi habarlamada.
Vedomstvo Memleket basshysynyń tapsyrmasy boiynsha Bas prokýratýra Qarjy monitoringi agenttigimen (QMA) birlesip ANK qyzmetin teksergenin atap ótti.
«Tekserý nátijesinde 2021 jyly ANK quramyna engen «Aýyl sharýashylyǵyn qoldaý qory» AQ basshylyǵynyń laýazymdyq ókilettigin teris paidalaný faktisi anyqtaldy. Ol «Shymkent qalasynda eki alma baǵyn otyrǵyzý» jobasyn iske asyrý kezinde oryn alǵan jáne memleketke materialdyq shyǵyn keltirgen. Atalǵan derek boiynsha 2024 jylǵy 10 shildede Bas prokýratýra Qylmystyq kodekstiń 361-baby 4-bóliginiń 3-tarmaǵy (laýazymdyq ókilettikterin teris paidalaný) boiynsha qylmystyq is qozǵady», – dep naqtylady vedomstvo.
Isti tergeý Shymkent qalasy boiynsha ekonomikalyq tergeý departamentine tapsyryldy.
«Is materialdaryna sáikes, ANK basqarma tóraǵasynyń eks-orynbasary I.M. jetkizýshi S.R.-dyń múddesin kózdep, Shymkent qalasyndaǵy alma baqtaryn tehnikalyq talaptarǵa jáne kórsetilgen óndiristik parametrlerge sáikes kelmese de qabyldap alǵan (oryndalmaǵan jumystardyń somasy – 430,6 mln teńge). Sonyń saldarynan memleketke búgingi kúni sarapshylar men mamandardyń qorytyndysy boiynsha 685,8 mln teńge kóleminde materialdyq shyǵyn kelgen. Qylmystyq is aiasynda qosymsha QK-niń 190-baby 4-bóliginiń 2-tarmaǵy (alaiaqtyq) jáne 189-baby 4-bóliginiń 2-tarmaǵy (bóten múlikti iemdený) boiynsha sotqa deiingi tergeýler tirkelip, bir óndiriske biriktirildi», – dep qosty Bas prokýratýra.
Atalǵan úkimniń zańdy kúshine enbegeni atap ótiledi.
