«اگرارلىق نەسيە كورپوراسياسى» اق (انك) باسقارما ءتوراعاسىنىڭ بۇرىنعى ورىنباسارى شىمكەنتتە سەگىز جىلعا سوتتالدى، دەپ حابارلايدى Dalanews.kz باس پروكۋراتۋرانىڭ باسپا ءسوز قىزمەتىنە سىلتەپ. 

«2025 جىلعى 7 تامىزدا شىمكەنت قالاسىنىڭ قىلمىستىق ىستەر جونىندەگى مەجرايوندىق سوتىنىڭ ۇكىمىمەن انك باسقارما ءتوراعاسىنىڭ ەكس-ورىنباسارى ي.م. مەن مەردىگەر ۇيىمنىڭ ديرەكتورى س.ر. سەگىز جىلعا باس بوستاندىعىنان ايىرۋ جازاسىنا كەسىلدى، مۇلكى تاركىلەندى»، – دەلىنگەن سارسەنبى كۇنگى حابارلامادا.

ۆەدومستۆو مەملەكەت باسشىسىنىڭ تاپسىرماسى بويىنشا باس پروكۋراتۋرا قارجى مونيتورينگى اگەنتتىگىمەن (قما) بىرلەسىپ انك قىزمەتىن تەكسەرگەنىن اتاپ ءوتتى.

«تەكسەرۋ ناتيجەسىندە 2021 جىلى انك قۇرامىنا ەنگەن «اۋىل شارۋاشىلىعىن قولداۋ قورى» اق باسشىلىعىنىڭ لاۋازىمدىق وكىلەتتىگىن تەرىس پايدالانۋ فاكتىسى انىقتالدى. ول «شىمكەنت قالاسىندا ەكى الما باعىن وتىرعىزۋ» جوباسىن ىسكە اسىرۋ كەزىندە ورىن العان جانە مەملەكەتكە ماتەريالدىق شىعىن كەلتىرگەن. اتالعان دەرەك بويىنشا 2024 جىلعى 10 شىلدەدە باس پروكۋراتۋرا قىلمىستىق كودەكستىڭ 361-بابى 4-بولىگىنىڭ 3-تارماعى (لاۋازىمدىق وكىلەتتىكتەرىن تەرىس پايدالانۋ) بويىنشا قىلمىستىق ءىس قوزعادى»، – دەپ ناقتىلادى ۆەدومستۆو.

ءىستى تەرگەۋ شىمكەنت قالاسى بويىنشا ەكونوميكالىق تەرگەۋ دەپارتامەنتىنە تاپسىرىلدى.

«ءىس ماتەريالدارىنا سايكەس، انك باسقارما ءتوراعاسىنىڭ ەكس-ورىنباسارى ي.م. جەتكىزۋشى س.ر.-دىڭ مۇددەسىن كوزدەپ، شىمكەنت قالاسىنداعى الما باقتارىن تەحنيكالىق تالاپتارعا جانە كورسەتىلگەن وندىرىستىك پارامەترلەرگە سايكەس كەلمەسە دە قابىلداپ العان (ورىندالماعان جۇمىستاردىڭ سوماسى – 430،6 ملن تەڭگە). سونىڭ سالدارىنان مەملەكەتكە بۇگىنگى كۇنى ساراپشىلار مەن مامانداردىڭ قورىتىندىسى بويىنشا 685،8 ملن تەڭگە كولەمىندە ماتەريالدىق شىعىن كەلگەن. قىلمىستىق ءىس اياسىندا قوسىمشا قك-نىڭ 190-بابى 4-بولىگىنىڭ 2-تارماعى (الاياقتىق) جانە 189-بابى 4-بولىگىنىڭ 2-تارماعى (بوتەن مۇلىكتى يەمدەنۋ) بويىنشا سوتقا دەيىنگى تەرگەۋلەر تىركەلىپ، ءبىر وندىرىسكە بىرىكتىرىلدى»، – دەپ قوستى باس پروكۋراتۋرا.

اتالعان ۇكىمنىڭ زاڭدى كۇشىنە ەنبەگەنى اتاپ وتىلەدى.