Jazǵy týristik maýsymǵa orai 2 maýsymnan "Shymkent-Semei-Shymkent" baǵytynda syiymdylyǵy 180 oryndyq "Airbus A320" ushaǵy jolaýshylardy tasymaldai bastady. Reisti "Fly Arystan" áýe kompaniiasy júzege asyrady, – dep habarlaidy Dalanews.kz
Jolaýshylar aptasyna 2 ret, dúisenbi jáne beisenbi kúnderi qatynaityn bolady. Shymkentten Semeige ushý ýaqyty – keshki saǵat 17:00-de, Semeiden Shymkentte ushý – keshki saǵat 19:00-de.
Jazǵy maýsymdyq áýe reisiniń ashylýy óńirge týrister tartýǵa múmkindik beredi. Jolaýshylar endi oblystaǵy respýblikalyq kieli oryndar tizimine engen Qońyr Áýlie úńgiri, "Jidebai-Bórili" mýzei-qoryǵy, Yrǵyzbai áýlie kesenesi, "Qozy Kórpesh-Baian sulý", "Eńlik-Kebek" eskertkishteri, Alakól men Shoshqaly sekildi tarihi jáne tabiǵi oryndardy tamashalaý múmkindigine ie bolady.
"Shymkent-Semei-Shymkent" baǵytyndaǵy reistiń ashylǵanyn turǵyndar qýanyshpen qabyldady.
"Bul reis halyqqa óte yńǵaily. Poiyzben birneshe táýlik júrýdiń qajeti joq. Ainalasy bir jarym saǵatta Semeige jetip alamyz. Jaz mezgilinde demalýǵa kelseń de óte qolaily", – deidi Shymkent qalasynyń turǵyny Nurlan Ádilhanov.
Qazirgi ýaqytta Semei qalasynan "Semei – Almaty", "Semei – Astana", "Semei – Úrjar", "Semei – Shymkent" baǵyttary boiynsha áýe reisteri oryndalýda. Atalǵan reisterdi "FlyArystan" jáne "Iýjnoe nebo" áýe kompaniialary júzege asyryp keledi.
Aita keteiik, 1 maýsymda Úrjar aýdanynyń Úrjar aýylyndaǵy áýejaiǵa alǵash ret "SCAT" áýe kompaniiasynyń "CRJ-200" jolaýshylar ushaǵy qondy. "Úrjar-Almaty" jáne "Úrjar-Astana" baǵyttary boiynsha turaqty áýe reisteri aptasyna 7 ret, iaǵni kún saiyn oryndalatyn bolady.
"Abai oblysy ákimdiginiń qoldaýymen "Qaraǵandy-Semei" baǵytynda sýbsidiialanatyn jańa áýe reisin ashý josparlanyp otyr. Qazirgi ýaqytta Kólik ministrliginiń Azamattyq aviatsiia komitetimen kelissóz júrgizilýde", - deidi Semei halyqaralyq áýejaiynyń direktory Ǵazizbek Samatov.
