Almaty oblysynda órtengen kúii tabylǵan 37 jastaǵy aǵa jedel ýákil Aslan Álserovtiń ólimine qatysty tergeý jalǵasyp jatyr. Syrt kózge tatý, sportpen ainalysatyn ári politsiia qyzmetindegi úlgili otbasy retinde tanylǵan Álserovter shańyraǵy búginde qoǵamdaǵy eń rezonansty qylmystyq isterdiń birine ainaldy, dep habarlaidy dalanews.kz.
Stan.kz tilshisi osy iske qatysty marqumnyń burynǵy áriptesimen sóilesip, Aslan Álserovtiń qyzmette qandai adam bolǵanyn, otbasy týraly ne biletinin jáne tergeý barysyna qatysty pikirin surady.
Burynǵy áriptesiniń aitýynsha, ol alǵashqyda qaza tapqan adamnyń Aslan Álserov ekenin birden túsinbegen. Sebebi qyzmettegi áriptesteri ony kóbine atymen emes, laqap atymen ataǵan.
"Eń áýeli, oqiǵa týraly málimetti kórgende, óltirilgen adamnyń Aslan ekenin birden túsinbedim. Óitkeni biz ony eshqashan atymen atai bermeitinbiz. Qaladaǵy áriptester arasynda ony kóbine "Basar" nemese "Slepoi" dep ataitynbyz. Ózi de ózin únemi "Slepoimyn" dep tanystyratyn. Nege dál solai atalǵanyn bilmeimin, jai ǵana solai qalyptasqan", – deidi marqumnyń burynǵy áriptesi.
Onyń sózinshe, Aslan Álserov páter urlyǵy isterin ashýda óte tájiribeli maman bolǵan. Qylmyskerlerdi anyqtap, ustaýda kásibi sheberligimen kózge túsken.
"Páter urlyǵy isterin ashýda ol naǵyz kásibi maman edi, qylmyskerlerdi ustaýda óte myqty edi. Qaladaǵy eń tájiribeli jedel ýákilderdiń biri sanaldy, ustalǵan kúdiktilerdiń sany da kóp edi", – dedi ol.
Burynǵy áriptesi marqumnyń qyzmet barysynda birneshe ret qaýipti jaǵdaiǵa tap bolǵanyn da aitty. Onyń sózinshe, Aslan Álserovke buǵan deiin birneshe márte qastandyq jasalǵan.
"Oǵan birneshe ret qastandyq jasaldy. Pyshaqtaǵan, oq atqan, jaq súiegin syndyrǵan, murnyn syndyrǵan jaǵdailar bolǵan", – deidi eks-politsei.
Áriptesiniń aitýynsha, Aslan Álserov óz isine berilgen, tájiribeli ári batyl jedel ýákil retinde este qalǵan. Qazir onyń ólimine qatysty tergeý jalǵasyp jatyr.
