Shymkent qalasynyń medısınalyq mekemelerine jańa jedel járdem kólikterin paıdalanýǵa berildi. Buǵan deıin qalaǵa ókpeni jasandy jeldetý apparattary, púlsoksımetrler jáne ottegi konsentratorlary bar gýmanıtarlyq júk kelgen bolatyn.

Atap aıtsaq, qalaǵa 10 ottegi konsentratory, 50 púlsoksımetr jáne bir  ókpeni jasandy jeldetý apparaty (ÓJJ) jetkizildi. Sondaı-aq, Shevrolet Damas markaly 3 jedel járdem kóligi keldi.

Bul kómek «Samuryq-Qazyna» AQ men QR Densaýlyq saqtaý mınıstrligi arasyndaǵy yntymaqtastyq týraly Memorandým aıasynda kórsetilip otyr. «Samuryq-Qazyna» AQ kompanıalar toby qaıyrymdylyǵynyń biryńǵaı operatory – «Samruk-Kazyna Trust» Áleýmettik jobalardy damytý qory qajetti jabdyqtardy satyp alyp, olardy óńirlerge jiberdi.

– Pandemıaǵa baılanysty dárigerler halyqqa medısınalyq kómek kórsetý úshin kúndiz-túni jumys isteýde. Kez kelgen kómek naýqasty der kezinde emdeýge úlken áserin tıgizip otyr.  Osyndaı qıyn-qystaý ýaqytta qol ushyn sozyp jatqan jandarǵa alǵysymyz sheksiz, – deıdi Shymkent qalalyq juqpaly aýrýlar aýrýhanasynyń bas dárigeri Erejepov Baqtyǵalı.