Shyǵysta úsh jylda 165 kópqabatty turǵyn úi halyqqa beriledi
Biyl jalpy aýmaǵy 645 myń sharshy metrdi quraityn 77 turǵyn úi qurylysy júrgizilip jatyr. Tek birinshi jartyjyldyqta 16 kópqabatty turǵyn úi qoldanysqa berildi. Jyl sońyna deiin taǵy 34 úidiń qurylysyn bastaý josparlanyp otyr. 46 joba ázirlendi, 64 joba jumys ústinde.
Danial Ahmetovtyń aitýynsha, biyl turǵyn úi jáne injenerlik jeliler qurylysyna 32,6 mlrd teńge bólinip, onyń 99,6 paiyzy tolyqtai igerilgen. «7-20-25» baǵdarlamasyn júzege asyrý boiynsha 1002 páter tolyqtai daiyn. Ekinshi deńgeili bankter 6,2 mlrd teńgege ipotekalyq turǵyn úi nesielerin berý boiynsha 698 ótinish qabyldandy. Bunyń barlyǵy aýqymdy jumystyń jarqyn kórinisi.
– Oblystyq qurylys basqarmasyna, qala jáne aýdan ákimderine aǵymdaǵy jyldyń ekinshi jartysynda 443 myń sharshy metr turǵyn úidi qoldanysqa berýdi tapsyramyn. Sonymen qatar qoldanystaǵy injenerlik-kommýnikatsiialyq infraqurylymdy tiimdi paidalanýǵa erekshe nazar aýdarý qajet. Biýdjettik qarajat esebinen jańa nysandardy salý kezinde negizsiz baǵalardyń ósýine jol bermeýimiz shart. Óskemen men Semei qalasy ákimderi 28-shi yqsham aýdany men «Ushaqtar» aýdanyndaǵy kópbalaly otbasylarǵa arnalǵan bir qabatty turǵyn úilerdi «Turǵyn úi-qurylys jinaq banki» arqyly jeńildetilgen 2%-ben berý jumystaryn júzege asyrý qajet,– dedi aimaq basshysy.
Aita ketsek, oblysta kópbalaly otbasylarǵa baspana berý jumysy alǵa qoiylǵan. Shilde aiynyń basynda aýyldaǵy 230 otbasyǵa jańa páter kiltteri tabys etildi. Aldaǵy ýaqytta bul baǵyt aýdan ortalyqtary men qalalarda iske asyrylatyn bolady.
Ásem JYLQYShIEVA, Shyǵys Qazaqstan oblysy
