Is-sharaǵa óńir basshysy Danial Ahmetov, QR Aqparat jáne qoǵamdyq damý ministrligi Etnosaralyq qatynastardy damytý komitetiniń tóraǵasy Ǵalym Shoikin, Dostyq úii men QHA belsendileri, «Assambleia jastary» qozǵalysynyń músheleri, oblys jastary men jurtshylyǵy qatysty.
1992 jyly Óskemende Qazaqstan tarihyndaǵy alǵashqy Dostyq úii ashyldy. – Oblys qalalary men aýdandarynyń 7 Dostyq úiiniń bazasynda 72 etnomádeni birlestik jumys isteidi, túrli ulttardyń 8 tili erkin oqytylady. Oblysta mediatsiiany ilgeriletýdiń oń tájiribesi jinaqtalǵan. Beiindi memlekettik organdarmen jáne kásipodaqtarmen memorandýmdar iske asyrylýda. Oblystyq Dostyq úiiniń bazasynda Mediatsiia kabinetiniń virtýaldy qabyldaý bólmesi jumys isteidi. Biz kásibi jáne qoǵamdyq mediatorlardyń áleýetin paidalana otyryp, mediativtik rásimderdi qoldanýdy keńeitýimiz qajet. Munyń bári aýqymdy etnosaralyq kommýnikatsiianyń tiimdi alańyna ainalýy tiis. Osy maqsatta biz 241 qalalyq, aýdandyq, aýyldyq okrýgtik Qoǵamdyq kelisim keńesteriniń, Analar keńesteriniń áleýetin barynsha paidalanýymyz qajet, – dedi ShQO ákimi Danial Ahmetov otyrys barysynda.
Sonymen qatar, ol ShQO halqy Assambleiasynyń ǵylymi-saraptamalyq tobyna etnografiialyq zertteýler men toleranttylyq mektebiniń jobasyn jalǵastyrýdy tapsyrdy. «Jastarmen jumys barlyq qoǵamdyq institýttar men Dostyq úileriniń bazasynda bolýy tiis. «Assambleia jastary» qozǵalysynyń músheleri jastardy eriktiler qozǵalysyna tartý, olardyń quqyqtyq saýattylyǵyn arttyrý, kásip alý men jumyspen qamtýdy memlekettik qoldaý sharalaryn túsindirý jumystaryn kúsheitýi qajet» dep atap ótti oblys ákimi.
Is-shara barysynda QR Aqparat jáne qoǵamdyq damý ministrligi etnosaralyq qatynastardy damytý komitetiniń tóraǵasy Ǵalym Shoikin Shyǵys Qazaqstan jurtshylyǵyn kele jatqan Respýblika kúnimen quttyqtady.
Sóz sońynda, Óskemendegi tuńǵysh Dostyq úiiniń 30 jyl boiy óńirdegi tatýlyq pen kelisim ordasy retindegi missiiasyn abyroimen atqaryp kele jatqanyn aita ketý oryndy.
