Shyǵysqazaqstandyq ǵalym sý tasqynynyń aldyn alatyn monitoringtik jeli jobasyn jasady, dep habarlaidy Dalanews.kz Altainews-ke silteme jasap.
S.Amanjolov atyndaǵy Shyǵys Qazaqstan ýniversitetiniń qaýymdastyrylǵan professory Marhaba Kármenova úsh meteostantsiiasy bar monitoringtik jeli ázirlep jatyr. Mundai ónertabys Qazaqstannyń agrotsenozdarynyń sý rejimin obektivti taldaýǵa jáne boljaýǵa múmkindik beredi. Bul keiinnen eldegi sý tasqyny jaǵdaiynyń aldyn alýǵa jáne aýyl sharýashylyǵy salasynyń damýyna oń áser beredi.
«Qazir komandamyzben jasandy intellekt pen saraptamalyq derekterdiń artyqshylyqtaryn paidalana otyryp innovatsiialyq júie quryp jatyrmyz. Jaýyn-shashyn, temperatýra, topyraq ylǵaldylyǵynyń jáne aýanyń ýltra sezimtal datchikterimen jabdyqtalǵan meteostantsiialar málimetterdi jinap, bizdiń serverge jiberedi. Alynǵan málimetter negizinde jasandy intellekt yqtimal sý tasqynyn, ónimdilikti boljai alady nemese belgili bir ýchaskede egýge keletin daqyldy anyqtai alady», - deidi Marhaba Ahmetollaqyzy.
Jańa joba Ǵylym jáne joǵary bilim ministrligi Ǵylym komitetiniń 2024-2026 jyldarǵa arnalǵan ǵylymi jáne ǵylymi-tehnikalyq jobalar boiynsha granttyq qarjylandyrýǵa arnalǵan baiqaýda úzdik dep tanylyp, ózektiligin dáleldedi.
ShQÝ ǵylymi tobynyń aldaǵy jumystary biryńǵai derekter bazasyn qurýǵa jáne aýyl sharýashylyǵyn júrgizý ádisteri, sý resýrstaryn basqarý jáne klimattyń ózgerýi jaǵdaiynda ósimdik sharýashylyǵyn beiimdeý strategiialary boiynsha praktikalyq usynymdar ázirleýge baǵyttalmaq.
