Naqtyraq aitqanda, 80 myńǵa jýyq balanyń ata-anasy qaýipti indettiń ekpesin alýǵa qarsylyǵyn joǵyn aitqan.
Álbette bul osy taraptaǵy jan-jaqty, tolyqqandy deńgeide júrgizilgen aqparattyq jumystyń nátijesinde múmkin bolǵan. Búgingi tańda aimaqtaǵy bilikti epidemiologtar osynshama balaǵa koronavirýs ekpesin salýǵa ázir otyr.
Osy máselege qatysty tolymdy aqparat alyp, biraz jaitqa qanyqqan kóptegen ata-analar ekpege qarsylyǵy joǵyn málimdemegen.
Aita ketelik, egý naýqany birneshe satydan turady. Alǵashqy kezeńde aimaqtaǵy 16 men 18 jasar oqýshylarǵa vaktsina salynady. Keiinnen ekpeni jasóspirimder men júkti áielder alatyn bolady. Bul máselede vaktsinaǵa qatysty tolyqqandy málimet berý asa ózekti ekenin ilgeride aittyq. Osyny eskergen shyǵysqazaqstandyq dárigerler «ekpege qarsylyǵy joq» ata-analardyń tizimin ázirleýde.
Mundaǵy maqsat erteńgi kúngi túsinbeýshiliktiń aldyn-alý. Vaktsinaǵa qarsylyǵy joq ata-analardyń qosynyn qalyptastyrý arqyly qoǵamnyń bul naýqanǵa qalai qaraitynyn baǵamdaýǵa bolady.
Ata-analarmen júrgizilgen aqparattyq jumystyń nátijesinde 2 myńnan asa oqýshy men kolledj jastary vaktsina kezegine turǵan. Mundaida oblystaǵy medmekemelerdiń naýqanǵa saqadai-sai bolýy da mańyzdy.
Osyny eskergen aimaq basshylyǵy óńirdegi emhanalarǵa «Pfizer» vaktsinasynyń 35 myń danasyn jedel jetkizgen, shyǵysqazaqstandyq dárigerler balalarǵa ekpe salý boiynsha arnaiy daiyndyqtan ótken.
Al vaktsinadan bas tartqan balalarǵa eshqandai shekteý qoiylmaidy. Olar bilim ordasyna emin-erkin kelip, oqýyn jalǵastyra beredi.
Sońǵy ýaqytta óńirde vaktsinaǵa qarsy ata-analarǵa qaraǵanda, ekpe alýdy qoldaityn ata-analardyń qatary kóbeigen. Óskemendegi № 1 emhana dárigeri Sájida Ahmetqyzynyń dereginshe sońǵy aptanyń ózinde 12 bala vaktsina saldyrǵan.
Al aqparattyq jumys munymen toqtap qalmaidy. Dárigerler vaktsina salmas buryn balanyń tolyq tekserýden óterin, tek sodan keiin baryp ekpe salýǵa qatysty naqty sheshim qabyldanaryn ata-analardyń qulaǵyna quiýda.
