ShQO basshysy Nurymbet Saqtaǵanov jumys saparymen Altai aýdanyna baryp, sý tasqynynyń aldyn alý sharalarynyń barysymen tanysty, - dep habarlaidy Dalanews.kz
Bul aýdan jaýyn-shashynnyń shamadan tys kóbeiýine bailanysty erekshe baqylaýǵa alynǵan bes eldi mekenniń qataryna jatady. Berezovka ózeninde qubyr tartý jumystary júrgizilip, Maleevsk aýylyndaǵy gidro-beket ornalasqan kópir aimaǵynda Buqtyrma ózeni arnasynyń jaǵdaiy tekserildi. Aýdandyq tótenshe jaǵdailar bólimi mamandarynyń aitýynsha, búgin jarylys jumystary bastalady. Bul ózen arnalarynda laidyń jinalýyn joiyp, aýdandy sýdyń kelýinen saqtaidy.
"Sý tasqyny kezeńinde eń bastysy – halyqty, infraqurylym nysandaryn qorǵaý. Osy maqsatta 105 qyzmetkerden turatyn, 44 birlik arnaiy tehnikamen jabdyqtalǵan oblystyq TJD arnaiy jasaǵy quryldy. Barlyq sý ótkizetin qurylys pen aryq tazartyldy. Qandai da bir ózgerister bolǵan jaǵdaida jedel áreket etý úshin Buqtyrma ózeniniń jaǵdaiyn táýlik boiy qadaǵalap otyrmyz", - dep atap ótti Nurymbet Saqtaǵanov.
Bir aita keterligi, mamandar Buqtyrma ózeninde muzdy burǵylap, synyqtaryn anyqtady. Sonyń áserinen 2018 jyly keibir eldi mekenderde sý tasqyny qaýpi paida bolǵan edi. Jarylys jumystary bul qaýipti joiýǵa kómektesedi. Qazirgi tańda atalǵan jumystar bes nysanda jalǵasyp jatyr.
Sondai-aq óńir basshysy jedel shtab úsh aýysymda jumys istep, jergilikti atqarýshy organdardyń sý tasqyny jaǵdailaryna daiyndyǵyn qadaǵalap otyrǵanyn basa aitty. Sapar barysynda qaýipti aimaqta ornalasqan Zýbovsk aýylynyń ákimi Nurymbet Saqtaǵanovqa jarylys jumystarynyń aýdanyn ulǵaitý týraly ótinish bildirdi. Bul jumystar apta sońyna deiin aiaqtalýy tiis.
"Eki kúnnen beri tolassyz jaýǵan qar kólemin eskere otyryp, ony shyǵaryp, aýlalardy tazartý jumystaryn barynsha kúsheitý qajet", – dedi oblys ákimi.
Qazir Altai aýdanynda turǵyndar sý tasqynyna qarsy is-sharalardyń mańyzyn túsinip, ony júzege asyrýǵa belsendi túrde qatysýda. Aita keteiik, aýdanda janar-jaǵarmaidyń jáne inertti materialdardyń jetkilikti qory bar. Barlyq kúshter men quraldar daiyn tur.
Eske salaiyq, buǵan deiin elimizdegi sý tasqyny qaýpi joǵary aimaqtar ataldy. Olardyń qatarynda Aqtóbe, Qostanai, Qaraǵandy, Aqmola, Soltústik Qazaqstan, Shyǵys Qazaqstan oblystary jáne Ulytaý jáne Abai oblystary bar.
