Búgin Shyǵys Qazaqstan oblysynyń ákimi Nurymbet Saqtaǵanov túrli salada tolaǵai tabystarǵa qol jetkizip júrgen áielder qaýymymen kezdesti,- dep habarlaidy Dalanews.kz
8 naýryz merekesi qarsańynda Nurymbet Saqtaǵanov shyǵysqazaqstandyq áielderdiń kez kelgen nárseni shyn júrekpen jasap, úilesimdilik pen sulýlyq syilaitynyn atap ótti. Óńirdegi názik jandylar bilim men densaýlyq saqtaý, biznes, ónerkásip salalarynda eńbek etip keledi. Olar joǵary nátijelerge qol jetkizip, oblystyń áleýmettik-ekonomikalyq damýyna ólsheýsiz úles qosýda. Degenmen áielder meiirimdi ári qamqor ana men áje, aiaýly jar, adal dos bolyp qala beredi.
"Sizder - sulýlyq pen náziktiktiń simvolysyzdar. Árqaisyńyzdyń tabysqa jetý joldaryńyz bólek, biraq sizderdi senimdilik, jaýapkershilik jáne jumysqa degen adaldyq biriktiredi. Óskeleń urpaqqa kórsetip kele jatqan úlgi-ónegelerińiz úshin, danalyqtaryńyz ben baǵa jetpes tájiribelerińiz úshin alǵys aitamyn", - dedi Nurymbet Saqtaǵanov.
Jiynǵa bilim, densaýlyq saqtaý, aýyl sharýashylyǵy, shaǵyn jáne orta biznes, ónerkásip jáne úkimettik emes uiymdardyń ókilderi qatysty.
ShQO Ana men bala ortalyǵynyń bas akýsher-ginekology Irina Nosakovanyń erligi kóptiń esinde. Ol basseinge batyp kete jazdaǵan balany aman alyp qalǵan edi. Kezdesý qatysýshylary ómiriniń talai jylyn súiikti isine arnaǵan 88 jastaǵy traktorshy Qaziia Mýsinamen de tildesti. Bilim salasynyń ardageri Sábira Qarybaeva, kásipker Oksana Kýcherina, oblys ákiminiń shtattan tys keńesshileri Zarina Kamasova, Olga Kýzovleva kezdesýden alǵan áserlerimen bólisti. Olar shyǵysqazaqstandyqtardyń ómirin qalai jaqsartýǵa bolatyny jóninde tájiribe almasyp, keńes berdi.
Óńir basshysy jumysshy mamandyq ókilderine de erekshe kóńil bóldi. Olardyń eńbegi kóp jaǵdaida kózge kórinbeidi, biraq óńir ekonomikasyna zor úles qosyp keledi. Sondyqtan olardyń bedelin arttyrý úshin Qazaqstan Respýblikasynyń Prezidenti 2025 jyldy «Jumysshy mamandyqtary jyly» dep jariialady.
Eresekterge arnalǵan ippoterapiiany damytý, perzenthanany qaita qurý syndy oblys turǵyndary úshin mańyzdy taqyryptar talqylandy. Bul názik jandylardyń ózekti máseleler týraly únemi alańdap, oń ózgeristerdi qalaitynyn taǵy bir márte dáleldeidi. Jiyn sońynda óńir basshysy barlyǵyna gúl shoqtary men alǵys hattar tabystap, olarǵa zor densaýlyq, mahabbat pen tabys tiledi.
