Shyǵys Qazaqstan oblysynda Aqtan Nurbaev atyndaǵy oblystyq aqyndar mektebi ashyldy, dep habarlaidy Dalanews.kz
Shyǵystyń kórikti ólkesi – qasietti Katonqaraǵai kóptegen daryndy tulǵalardyń kindik qany tamǵan jer. Altaidyń arda uly, qazaqtyń klassik jazýshysy Qalihan Ysqaqtyń 90 jyldyǵy men sara sózdiń sheberi Didahmet Áshimhanulynyń 75 jyldyq mereitoilary aiasynda oblysta mańyzdy rýhani sharalar uiymdastyrylýda. Sonyń biri – oblysta belgili aitysker aqyn, Katonqaraǵaidyń talantty týmasy Aqtan Nurbaev atyndaǵy oblystyq aqyndar mektebiniń ashylýy.
Óskemende tusaýy kesilgen bul mektep aitys ónerine den qoiǵan daryndy jastardyń basyn qosyp, baǵyt-baǵdar berýdi, jańa talanttardyń qalyptasýyna yqpal etýdi kózdeidi. Aqtan Nurbaev Keńes dáýirinde óńirimizde aitys ónerin damytýǵa atsalysqan beldi aqyndardyń biri. Sondyqtan onyń esimin ielengen aqyndar mektebi qazaqtyń sýyrypsalma ónerin jańa deńgeige kótermek.
Aqyndar mektebiniń ashylýyna qazaq aitysynyń qara nary, aqyn, qoǵam qairatkeri Júrsin Erman bastaǵan el aǵalary qatysty. Saltanatty sharada sondai-aq Parlament Májilisiniń depýtaty, aitysker aqyn Amanjol Áltai, Memlekettik syilyqtyń iegeri, aqyn Ulyqbek Esdáýlet, belgili pýblitsist Álibek Qańtarbaev, respýblikamyzǵa tanymal aityskerler Serikzat Dúisenǵazy, Janarbek Áshimjan, Dáýlet Smetov, Abash Kákenov, sondai-aq Aqtan aqynnyń urpaqtary, ziialy qaýym ókilderi boldy.
Oblystyq mádeniet basqarmasynyń bastamasymen ashylǵan aqyndar mektebi Óskemen jáne oblys kólemindegi aqyndyqqa beiim jastardy sýyrypsalma ónerge baýlyp, poeziia men mánerlep oqýǵa mashyqtandyrýdy, sondai-aq jas talanttarǵa shyǵarmashylyq baǵyt-baǵdar berýdi maqsat etedi.
"Aqyndar mektebin ashýdaǵy negizgi maqsat – ulttyq ónerdi dáripteý, jastardy aitys ónerine baýlý, qazaq poeziiasynyń jańa býynyn qalyptastyrý", – dedi saltanatty jiynda jazýshy, pýblitsist Álibek Qańtarbaev.
Aqyndar mektebi A.S. Pýshkin atyndaǵy Shyǵys Qazaqstan oblystyq kitaphanasynda ornalasqan. Onyń ashylýyna Aqtan Nurbaevtyń urpaqtary, onyń ishinde Erjan Nurbaev demeýshilik jasady.
Bul igilikti is «Qara sózdiń qarageri – Qalihan» atty respýblikalyq aqyndar aitysymen jalǵasty. Al jaz ailarynda Qalihan Ysqaq pen Didahmet Áshimhanulynyń týǵan jeri – Katonqaraǵai aýdanynda aýqymdy respýblikalyq sharalar ótpek.
