Búgin aimaqta Ulttyq kitap kúni atalyp ótti. Osyǵan orai ShQO ákimi Nurymbet Saqtaǵanov óńir turǵyndaryn quttyqtady, dep habarlaidy Dalanews.kz.
Bul kúni A.S. Pýshkin atyndaǵy Shyǵys Qazaqstan oblystyq kitaphanasy ǵimaratynyń aldynda túrli jastaǵy turǵyndar jinalyp, kitap pen oqý mádenietine qurmet kórsetti. Atalǵan rýhaniiat ordasyna 130 jyl toldy. Óńir basshysy buǵan deiin atap ótkendei, munda sońǵy jiyrma jylda alǵash ret demeýshiler qarajaty esebinen kúrdeli jóndeý júrgizildi.
Ákim óz sózinde kitaptyń jeke tulǵanyń qalyptasýy men dúnietanymyn keńeitýdegi mańyzy zor ekenin, al óńirde kitap oqýǵa degen qyzyǵýshylyqtyń turaqty túrde artyp kele jatqanyn aitty.
QR Ulttyq statistika biýrosynyń resmi málimetinshe, Shyǵys Qazaqstan oblysy eldegi oqý zaldaryna kelýshiler sany boiynsha kóshbasshylar qatarynda.
2025 jyldyń qorytyndysy boiynsha óńir 3 452 783 kelýshi kórsetkishimen 4-orynǵa ie boldy. Al alǵashqy úshtikte Soltústik Qazaqstan (4 649 072), Túrkistan (4 149 395) jáne Aqmola (3 736 916) oblystary bar. Sońǵy orynda Atyraý (1 270 012) jáne Mańǵystaý (1 038 190) oblystary tur.
QR Prezidenti Qasym-Jomart Toqaev atap ótkendei, kitaptar áli de rýhani-adamgershilik qundylyqtar álemine jeteleitin senimdi qural bolyp qala beredi.
«Oqý mádenieti ult sapasynyń birden-bir ólshemi retinde halqymyzdyń bitim-bolmysyna tán ainymas qasiet bolyp qala berýge tiis».
Qazirgi tańda oblysta 170 kitaphana jumys isteidi. Búginde olar zamanaýi mádeni-aǵartýshylyq alańǵa ainaldy.
“Biz oblys turǵyndarynyń kitap oqýǵa degen qyzyǵýshylyǵy artyp kele jatqanyn kórip otyrmyz. Bizdiń mindet – osy suranysty qoldaý: kitaphanalardy damytý, kitaptardy qoljetimdi etý jáne jastar arasynda turaqty oqý mádenietin qalyptastyrý”, – dedi ákim Nurymbet Saqtaǵanov.
Kitaphanalardy jańǵyrtýǵa, aǵartýshylyq is-sharalardy ótkizýge jáne balalar men jasóspirimderdi kitap oqýǵa tartýǵa erekshe kóńil bólinýde.
