Katar astanasy Doha mańynda krýizdik lainerde qalyp qoiǵan reseilik týrister Qazaqstan men Ózbekstan elshilikteri óz azamattaryna jedel kómek kórsetip jatqanyn aitty, dep habarlaidy Dalanews.kz.
Reseilik týristiń aitýynsha, ol jáne taǵy birneshe jolaýshy Dohada turǵan krýizdik kemede qalyp qoiǵan. Olardyń basym bóliginiń ushaǵy Dýbaidan ushýy tiis bolǵan.
Ol qazirgi jaǵdaidy túsindire kele, teńiz de, áýe keńistigi de jabyq bolǵandyqtan, jolaýshylar kemeden shyǵyp, Dýbaiǵa jete almai otyrǵanyn aitty.
"Biz Reseiden kelgen týristermiz. Qazir Katardaǵy Dohada lainerde qalyp qoidyq. Kópshiligimizdiń ushaǵymyz Dýbaidan edi. Biraq teńiz de, áýe keńistigi de jabyq. Sol sebepti biz 7 naýryzǵa deiin kemede bolamyz degen aqparat aityldy", - dedi ol.
Qazaqstan elshiligi jedel áreket etken
Týristiń sózinshe, kemede Qazaqstan men Ózbekstan azamattary da bar. Onyń aitýynsha, Qazaqstan elshiligi óz azamattarynyń ótinishine jedel jaýap bergen.
"Mysaly, bizdiń qasymyzda Qazaqstannan kelgen adamdar bar. Olar óz elshiligine habarlasqan. Elshilik sol kúni birden jaýap berip, olardy shyǵarý týraly sheshim qabyldady. Qazaqstan azamattary úshin Saýd Arabiiasyna arnaiy ushaq jiberilgen", - dedi týrist.
Onyń aitýynsha, qazirgi ýaqytta Qazaqstan azamattaryna Saýd Arabiiasyna barý úshin vizalar rásimdelip jatyr.
"Qazir lainerdegi resepshnde Saýd Arabiiasyna viza rásimdeý júrip jatyr. Erteń olar jeke avtobýstarmen Saýd Arabiiasyna jetkiziledi. Sol jerden óz elderine tegin ushaqpen ushady", - dedi ol.
Ózbekstan da shara qabyldaǵan
Týristiń aitýynsha, Ózbekstan elshiligi de óz azamattaryna kómektesý úshin jedel áreket etken.
"Ózbekstan elshiligi de tez jaýap berdi. Olar arnaiy chat ashyp, azamattaryn uiymdastyryp jatyr. Iaǵni olardyń máselesi boiynsha da qozǵalys bar", - dedi ol.
Resei týristeri kómek kútýde
Al reseilik týristerdiń jaǵdaiy basqasha ekenin aitqan jolaýshy Resei elshiligine birneshe ret habarlasqandaryn jetkizdi.
"Biz de Katardaǵy Resei elshiligine jazyp jatyrmyz. Biraq bizge tek chat-bottan standartty jaýap keledi. Bizge «7 naýryzǵa deiin kútińizder, keiin kóre jatarmyz» dep aityldy. Tótenshe jaǵdai rejimi jariialanbaǵandyqtan, evakýatsiialyq reister josparlanbaǵany aityldy", - dedi ol.
Týristiń aitýynsha, osy jaǵdai olar úshin eń ókinishti másele bolyp otyr.
Sondai-aq ol áleýmettik jeli qoldanýshylaryn óz videosyn taratyp, jaǵdaiǵa qoǵam nazaryn aýdarýǵa shaqyrdy. Onyń sózinshe, bul máseleniń jariia bolýy Resei azamattaryn elge qaitarý máselesin jedeldetýi múmkin.
Sonymen qatar,Balide turatyn reseilik bloger Denis Smychek áleýmettik jelidegi paraqshasynda Qatarda qalyp qoiǵanyn málimdedi. Onyń aitýynsha, sol jerde júrgen Qazaqstan azamattaryna Jidda qalasyna avtobýspen jetkiziletini týraly habar berilgen. Al blogerdiń sózinshe, dál sol ýaqytta Resei elshiligi óz azamattarymen bailanysqa shyqpaǵan.
Eske salaiyq, búgin túnde Taiaý Shyǵys elderinde qalyp qoiǵan myńǵa jýyq qazaqstandyq elge jetkizilgen bolatyn.
