Búgin Májilis otyrysynda depýtat Jarqynbek Amantaiuly tosyn málimdeme jasady, dep habarlaidy Dalanews.kz.
Onyń aitýynsha, qazir halyqaralyq qatynastar júiesinde geosaiasi, geoekonomikalyq shielenis kúsheie túsken, memleketter arasyndaǵy sanktsiia shekteýi ulǵaiýy, áskeri-saiasi teketires jiileýi álemdik qaýipsizdik arhitektýrasyna aitarlyqtai áser etip otyr.
"Osyndai kúrdeli jaǵdaida túrli taraptar qarýly qaqtyǵysqa adam tartý úshin jaldaý, aldaý, úgitteý tásilin belsendi qoldanyp jatyr. Ókinishke qarai, mundai yqpalǵa túsken otandastarymyzdyń sany artyp barady", - dedi depýtat.
Jarqynbek Amantaiuly mynadai derek keltirdi: Qylmystyq kodekstiń 172-baby boiynsha (sheteldik qarýly qaqtyǵystarǵa qatysý) tirkelgen qylmystyq ister sany jyl saiyn ósip jatyr, 2023 jyly 23 is, 2024 jyly 36 is, 2025 jyly 141 is tirkelgen. 2025 jyly tirkelgen ister boiynsha 26 adam sottalǵan.
"Halyqaralyq tájiribege nazar aýdarsaq, birqatar memleket óz azamattary sheteldiń resmi qarýly kúshteri quramynda urys qimylyna qatysýyn qylmys retinde qarastyrmaidy. Qatań jaýapkershilik negizinen terroristik uiymdar qataryna qosylǵandarǵa, áskeri qylmys jasaǵandarǵa nemese óz memleketiniń ulttyq múddesine qarsy áreket etkenderge qoldanylady. Árine, qarýly qaqtyǵys aimaǵyna eshkim ajal izdep, sebepsiz barmaidy. Biri áleýmettik qiyndyq saldarynan, biri adasý nemese aldaný arqyly, endi biri májbúrleý jaǵdaiynda barýy múmkin. Osyndai jaǵdaiǵa tap bolǵandardyń deni tabysty jumys tabamyz degen úmittiń jeteginde júrip, urynyp qalǵanyn aitady. Quryqqa ilingenin túsingen shaqta sheginerge jer joq, sharasyz jat eldiń qandy maidanynyń qatysýshysyna ainalady. Artta ańyrap ata-ana, eńirep otbasy men jaqyndary qalady. Alaida óz isine ókinip, elge oralýǵa niet bildirgen azamattar úshin qazirgi zańnamadaǵy qatań sanktsiia eleýli tosqaýyl bolyp otyr. Táýbesine kelip, Otanǵa oralǵan azamattyń uzaq merzimge bas bostandyǵynan aiyrylýy onyń tolyq qaita áleýmettenýine keri áser etýi múmkin", - dedi ol.
Depýtattyń pikirinshe, sottalǵandar arasynda Resei azamattyǵyn alǵandary da bar.
"Jýyrda 6 jylǵa bas bostandyǵynan aiyrylǵan Evgenii Liýft sol eldiń azamaty bolǵan degen áńgime bar. Osy rette halyqaralyq tájiribeni jáne ulttyq qaýipsizdik múddesin eskerip, terroristik uiymdar quramynda bolmaǵan jáne áskeri qylmys jasamaǵan azamattarǵa qatysty qylmystyq saiasatty izgilendirý máselesin qarastyrý oryndy dep sanaimyz. Bilmestikpen bir súringen azamattarymyzdy elden erek qatań jazaǵa tartý qanshalyq oryndy?!" - degen saýal qoidy ol.
