Qazir qazaqstandyqtardyń kóbi shetelde bilim alyp, jumys istep, mansap qurýda. Alaida basqa elge kóshý olardy otandaǵy salyq mindettemelerinen tolyq bosatpaidy. Salyq jónindegi sarapshy Ekaterina Kim qazaqstandyqtar qai jaǵdaida deklaratsiia tapsyryp, salyq tóleýge mindetti ekenin túsindirdi, dep habarlaidy Dalanews.kz ZTB-ǵa siltep.
Sarapshynyń aitýynsha, bári adamnyń salyq rezidenti mártebesine bailanysty. Eger azamat jylyna 183 kúnnen astam ýaqyt Qazaqstanda ótkizse nemese onyń ómirlik múddeleriniń ortalyǵy osynda qalsa, ol rezident bolyp sanalady. Bul jaǵdaida ol 270.00 nysanyndaǵy deklaratsiiany tapsyryp, barlyq tabysynan – Qazaqstanda da, shetelde de alǵan kiristerinen – jeke tabys salyǵyn tóleýge mindetti.
Al rezident emes qazaqstandyqtar tek Qazaqstannan tapqan tabysynan ǵana salyq tóleidi. Mysaly, el ishindegi jyljymaityn múlikti jalǵa berýden, biznes júrgizýden nemese múlikti satýdan túsken kirisinen.
Azamat shetelde ómir súrse de, Qazaqstannan tapqan kirisi jalpy tártippen salyq salýǵa jatady. Bul tabystardy da 270.00 nysany boiynsha deklaratsiialaýǵa mindetti.
Sarapshynyń sózinshe, salyq organdary qazir basqa eldermen derekter almasýdy belsendi júrgizýde. Sondyqtan sheteldegi tabystardy jasyrý múmkin emes deýge bolady.
Aldymen salyq organy kameraldyq baqylaý aiasynda habarlama jiberedi;
Eger azamat 30 jumys kúni ishinde jaýap bermese, tekserý júrgizilýi múmkin;
Deklaratsiiany ýaqytyly tapsyrmaǵany úshin ákimshilik aiyppul qarastyrylǵan;
Buǵan qosa, ár keshiktirilgen kún úshin ósimpul esepteledi.
Shetelde turatyn qazaqstandyq azamattarǵa eki elde birdei salyq tóleý qajet pe degen suraq birneshe faktorǵa bailanysty:
salyq rezidenti mártebesine;
Qazaqstan men sol el arasyndaǵy qosarlanǵan salyq salýdy boldyrmaý týraly kelisimniń bar-joǵyna.
Sarapshy atap ótkendei, mundai kelisimderdi Qazaqstan kóptegen memleketpen jasasqan.
