ءقازىر قازاقستاندىقتاردىڭ كوبى شەتەلدە ءبىلىم الىپ، جۇمىس ىستەپ، مانساپ قۇرۋدا. الايدا باسقا ەلگە كوشۋ ولاردى وتانداعى سالىق مىندەتتەمەلەرىنەن تولىق بوساتپايدى. سالىق جونىندەگى ساراپشى ەكاتەرينا كيم قازاقستاندىقتار قاي جاعدايدا دەكلاراسيا تاپسىرىپ، سالىق تولەۋگە مىندەتتى ەكەنىن ءتۇسىندىردى، دەپ حابارلايدى Dalanews.kz ZTB-عا سىلتەپ. 

ساراپشىنىڭ ايتۋىنشا، ءبارى ادامنىڭ سالىق رەزيدەنتى مارتەبەسىنە بايلانىستى. ەگەر ازامات جىلىنا 183 كۇننەن استام ۋاقىت قازاقستاندا وتكىزسە نەمەسە ونىڭ ومىرلىك مۇددەلەرىنىڭ ورتالىعى وسىندا قالسا، ول رەزيدەنت بولىپ سانالادى. بۇل جاعدايدا ول 270.00 نىسانىنداعى دەكلاراسيانى تاپسىرىپ، بارلىق تابىسىنان – قازاقستاندا دا، شەتەلدە دە العان كىرىستەرىنەن – جەكە تابىس سالىعىن تولەۋگە مىندەتتى.

ال رەزيدەنت ەمەس قازاقستاندىقتار تەك قازاقستاننان تاپقان تابىسىنان عانا سالىق تولەيدى. مىسالى، ەل ىشىندەگى جىلجىمايتىن مۇلىكتى جالعا بەرۋدەن، بيزنەس جۇرگىزۋدەن نەمەسە مۇلىكتى ساتۋدان تۇسكەن كىرىسىنەن.

ازامات شەتەلدە ءومىر سۇرسە دە، قازاقستاننان تاپقان كىرىسى جالپى تارتىپپەن سالىق سالۋعا جاتادى. بۇل تابىستاردى دا 270.00 نىسانى بويىنشا دەكلاراسيالاۋعا مىندەتتى.

ساراپشىنىڭ سوزىنشە، سالىق ورگاندارى ءقازىر باسقا ەلدەرمەن دەرەكتەر الماسۋدى بەلسەندى جۇرگىزۋدە. سوندىقتان شەتەلدەگى تابىستاردى جاسىرۋ مۇمكىن ەمەس دەۋگە بولادى.

الدىمەن سالىق ورگانى كامەرالدىق باقىلاۋ اياسىندا حابارلاما جىبەرەدى؛

ەگەر ازامات 30 جۇمىس كۇنى ىشىندە جاۋاپ بەرمەسە، تەكسەرۋ جۇرگىزىلۋى مۇمكىن؛

دەكلاراسيانى ۋاقىتىلى تاپسىرماعانى ءۇشىن اكىمشىلىك ايىپپۇل قاراستىرىلعان؛

بۇعان قوسا، ءار كەشىكتىرىلگەن كۇن ءۇشىن ءوسىمپۇل ەسەپتەلەدى.

شەتەلدە تۇراتىن قازاقستاندىق ازاماتتارعا ەكى ەلدە بىردەي سالىق تولەۋ قاجەت پە دەگەن سۇراق بىرنەشە فاكتورعا بايلانىستى:

سالىق رەزيدەنتى مارتەبەسىنە؛

قازاقستان مەن سول ەل اراسىنداعى قوسارلانعان سالىق سالۋدى بولدىرماۋ تۋرالى كەلىسىمنىڭ بار-جوعىنا.

ساراپشى اتاپ وتكەندەي، مۇنداي كەلىسىمدەردى قازاقستان كوپتەگەن مەملەكەتپەن جاساسقان.