Қазір қазақстандықтардың көбі шетелде білім алып, жұмыс істеп, мансап құруда. Алайда басқа елге көшу оларды отандағы салық міндеттемелерінен толық босатпайды. Салық жөніндегі сарапшы Екатерина Ким қазақстандықтар қай жағдайда декларация тапсырып, салық төлеуге міндетті екенін түсіндірді, деп хабарлайды Dalanews.kz ZTB-ға сілтеп. 

Сарапшының айтуынша, бәрі адамның салық резиденті мәртебесіне байланысты. Егер азамат жылына 183 күннен астам уақыт Қазақстанда өткізсе немесе оның өмірлік мүдделерінің орталығы осында қалса, ол резидент болып саналады. Бұл жағдайда ол 270.00 нысанындағы декларацияны тапсырып, барлық табысынан – Қазақстанда да, шетелде де алған кірістерінен – жеке табыс салығын төлеуге міндетті.

Ал резидент емес қазақстандықтар тек Қазақстаннан тапқан табысынан ғана салық төлейді. Мысалы, ел ішіндегі жылжымайтын мүлікті жалға беруден, бизнес жүргізуден немесе мүлікті сатудан түскен кірісінен.

Азамат шетелде өмір сүрсе де, Қазақстаннан тапқан кірісі жалпы тәртіппен салық салуға жатады. Бұл табыстарды да 270.00 нысаны бойынша декларациялауға міндетті.

Сарапшының сөзінше, салық органдары қазір басқа елдермен деректер алмасуды белсенді жүргізуде. Сондықтан шетелдегі табыстарды жасыру мүмкін емес деуге болады.

Алдымен салық органы камералдық бақылау аясында хабарлама жібереді;

Егер азамат 30 жұмыс күні ішінде жауап бермесе, тексеру жүргізілуі мүмкін;

Декларацияны уақытылы тапсырмағаны үшін әкімшілік айыппұл қарастырылған;

Бұған қоса, әр кешіктірілген күн үшін өсімпұл есептеледі.

Шетелде тұратын қазақстандық азаматтарға екі елде бірдей салық төлеу қажет пе деген сұрақ бірнеше факторға байланысты:

салық резиденті мәртебесіне;

Қазақстан мен сол ел арасындағы қосарланған салық салуды болдырмау туралы келісімнің бар-жоғына.

Сарапшы атап өткендей, мұндай келісімдерді Қазақстан көптеген мемлекетпен жасасқан.