Ulttyq ulan sarbazy, qyzmet barysynda aýyr bas-mi jaraqatyn alǵan Erbaian Muhtar ońaltý kýrsynyń ekinshi kezeńinen ótý úshin Ystanbulǵa ushyp ketti,- dep habarlaidy Dalanews.kz
Bul týraly sarbazdyń advokaty Inga Imanbai jazdy. Onyń aitýynsha, Erbaian ata-anasymen birge búgin tańǵy saǵat beste Ystanbulǵa attanǵan. Aldaǵy úsh aida ol tolyqqandy reabilitatsiia kýrsynan ótpek.
– Bul Erbaian úshin sheshýshi kezeń. Bir jyl ishinde ol ata-anasynyń ǵana emes, búkil halyqtyń ulyna ainaldy. Onyń taǵdyry myńdaǵan adamnyń júregine áser etti. Eger alǵashqy emdeý kezeńi halyqtyń qoldaýymen júzege assa, bul joly memleket úlken kómek kórsetti. Qymbat ári asa mańyzdy emge úsh ailyq qarjylandyrý bólindi, al ushýdy Ishki ister jáne Qorǵanys ministrlikteri uiymdastyrdy, – dedi Inga Imanbai.
Advokat sondai-aq Densaýlyq saqtaý ministri Aqmaral Álnazarovaǵa jáne general Qairat Ómbetovke qoldaý kórsetkenderi úshin alǵys bildirdi.
Aita keteiik, alǵashqy emdeý kezeńinen keiin de halyq jinalǵan qarajattyń bir bóligi qalǵan. Ol bolashaqta Erbaiannyń ári qaraiǵy ońaltýyna jumsalýy múmkin.
– Alda úsh ailyq synaq tur. Bul bizdi eń úlken armanǵa – Erbaiandy aiaqqa turǵyzyp, onyń daýsyn estýge jaqyndatady. Qansha ýaqyt qajet bolatynyn eshkim dóp basyp aita almaidy. Biraq halyqtyń qoldaýymen, ata-anasynyń qaisarlyǵymen jáne dárigerlerdiń eńbegimen biz sol kúnge jetemiz dep senemin, – dedi advokat.
