ۇلتتىق ۇلان ساربازى، قىزمەت بارىسىندا اۋىر باس-مي جاراقاتىن العان ەربايان مۇحتار وڭالتۋ كۋرسىنىڭ ەكىنشى كەزەڭىنەن ءوتۋ ءۇشىن ىستانبۇلعا ۇشىپ كەتتى،- دەپ حابارلايدى Dalanews.kz
بۇل تۋرالى ساربازدىڭ ادۆوكاتى ينگا يمانباي جازدى. ونىڭ ايتۋىنشا، ەربايان اتا-اناسىمەن بىرگە بۇگىن تاڭعى ساعات بەستە ىستانبۇلعا اتتانعان. الداعى ءۇش ايدا ول تولىققاندى رەابيليتاسيا كۋرسىنان وتپەك.
– بۇل ەربايان ءۇشىن شەشۋشى كەزەڭ. ءبىر جىل ىشىندە ول اتا-اناسىنىڭ عانا ەمەس، بۇكىل حالىقتىڭ ۇلىنا اينالدى. ونىڭ تاعدىرى مىڭداعان ادامنىڭ جۇرەگىنە اسەر ەتتى. ەگەر العاشقى ەمدەۋ كەزەڭى حالىقتىڭ قولداۋىمەن جۇزەگە اسسا، بۇل جولى مەملەكەت ۇلكەن كومەك كورسەتتى. قىمبات ءارى اسا ماڭىزدى ەمگە ءۇش ايلىق قارجىلاندىرۋ ءبولىندى، ال ۇشۋدى ىشكى ىستەر جانە قورعانىس مينيسترلىكتەرى ۇيىمداستىردى، – دەدى ينگا يمانباي.
ادۆوكات سونداي-اق دەنساۋلىق ساقتاۋ ءمينيسترى اقمارال ءالنازاروۆاعا جانە گەنەرال قايرات ومبەتوۆكە قولداۋ كورسەتكەندەرى ءۇشىن العىس ءبىلدىردى.
ايتا كەتەيىك، العاشقى ەمدەۋ كەزەڭىنەن كەيىن دە حالىق جينالعان قاراجاتتىڭ ءبىر بولىگى قالعان. ول بولاشاقتا ەرباياننىڭ ءارى قارايعى وڭالتۋىنا جۇمسالۋى مۇمكىن.
– الدا ءۇش ايلىق سىناق تۇر. بۇل ءبىزدى ەڭ ۇلكەن ارمانعا – ەرباياندى اياققا تۇرعىزىپ، ونىڭ داۋسىن ەستۋگە جاقىنداتادى. قانشا ۋاقىت قاجەت بولاتىنىن ەشكىم ءدوپ باسىپ ايتا المايدى. ءبىراق حالىقتىڭ قولداۋىمەن، اتا-اناسىنىڭ قايسارلىعىمەن جانە دارىگەرلەردىڭ ەڭبەگىمەن ءبىز سول كۇنگە جەتەمىز دەپ سەنەمىن، – دەدى ادۆوكات.
