Sherzat Bolattyń ólimine qatysty sot protsesinde jábirlenýshi taraptyń advokaty Baǵdagúl Ajyǵalieva prokýrorlar usynǵan keibir dálelderge kúmán keltirip, birqatar mańyzdy jaittardy alǵa tartty. Bul týraly advokat YouTube-taǵy "Giperborei" arnasyna bergen suhbatynda málimdedi, dep habarlaidy Dalanews.kz.
Ajyǵalievanyń aitýynsha, 29 mamyrda memlekettik aiyptaýshylar qolyndaǵy dálelderdi kórsetip bolǵannan keiin, jábirlenýshi tarap óz zertteýin bastaǵan. Osy kezeńde advokat prokýrorlardyń nazarynan tys qalǵan, jasyryn tergeý áreketteriniń jazbasyn sot nazaryna usynǵan.
"Qarapaiym tilmen aitqanda, bul – sottalýshylardyń kameradaǵy ózara áńgimesiniń jazbasy, iaǵni resmi dálel. Men sot tóraǵasynyń ruqsatymen sol jazbanyń stenogrammasyn jariialadym", – deidi Ajyǵalieva.
Advokattyń sózinshe, bul áńgime sottalýshylar Shynasyl Abzal men Nurqiias Iliiasov arasynda bolǵan.
"Áńgimede Abzaldyń Nurqiiasqa: "Seniń atqanyń týraly eshqandai aqparat joq qoi!" degeni anyq jazylǵan. Nurqiias oǵan: "Múmkin umytyp ketken shyǵar, sen bul týraly eshkimge aitpa", – deidi. Bul áńgime maǵan kúmándi kórindi. Áńgime qandai atý jaily, ony kim jáne qashan jasaǵan, muny jasyryn ustaýǵa ne sebep boldy degen suraqtar týyndady", – deidi advokat.
Ajyǵalieva prokýrorlardyń dál osy stenogrammany sotqa usynbaǵanyna tańdanys bildirdi. Onyń aitýynsha, stenogramma sot materialdarynda bolǵanymen, onyń negizinde jazylǵan videojazbanyń ózi "disk zaqymdaldy" degen sebeppen iske enbei qalǵan.
"Sot protsesinde prokýror Erjan Quraqbaev dálel bolatyn diskini taba almai, sońynda disktiń zaqymdalǵanyn habarlady. Biraq osy kezde prokýror Dana Sársenbai disk joǵalmaǵanyn, tek isten alyp tastalǵanyn aitty. Men bul jerde túsiniksiz jaǵdai bar dep oilaimyn, óitkeni eki prokýrordyń málimdemesi bir-birine qaishy keldi", – deidi Ajyǵalieva.
Advokat bul jaǵdaidy tergeý isiniń óreskel kemshiligi dep baǵalaidy.
"Bul disktiń túpnusqasy negizgi aqparat kózinde saqtalǵany anyq. Eger bir disk búlinse, nege bastapqy jazbadan ekinshi diskke qaita kóshirip, dálel retinde usynbaǵan? Eger bul jazbanyń sotta paidalanylmaityny aldyn ala belgili bolsa, stenogrammany tergeý hattamasynan alyp tastaýlary kerek edi. Al stenogramma iste bar bolǵandyqtan, men ony jariia ettim. Iaǵni, sot protsesinde jasyryn derek ashyldy", – deidi advokat.
Ajyǵalievanyń pikirinshe, sýdia Erjan Januzaqov ta bul jaitqa beijai qaraǵan. Sot materialyndaǵy mańyzdy qujattardyń biriniń túbirtegi de ishinara joq bolyp shyqqan. Biraq sýdia bul máselege nazar aýdarmaǵan.
Advokat sotta mańyzdy ról atqarǵan taǵy bir dálel retinde kólik ishindegi videoregistrator jazbasyn atap ótti.
"Bul jazbada kýáger qyzdardyń oqiǵadan keiin eshqandai shok jaǵdaiynda bolmaǵany anyq kórinedi. Olar qalypty jaǵdaida, kúlip, bolǵan jaitty talqylap otyr. Telefonmen sóileskenderi de anyq jazylǵan. Al sotta olar politsiiaǵa habar bermegenin "bizde telefon bolǵan joq" dep túsindirgen edi. Bul videojazba olardyń kýálikterin túbegeili joqqa shyǵardy", – deidi advokat.
Osylaisha, Ajyǵalieva bul jazba sot otyrysynda mańyzdy dálel bolǵanyn jetkizdi. Videoda sottalýshylardyń da, kýágerlerdiń de birqatar sózi teriske shyqqan.
Sondai-aq ol prokýrorlar men tergeý toby ókilderiniń arasynda da túsiniksiz jaittar bolǵanyn atap ótti.
Eske salaiyq, 2024 jyldyń 4 qazanynda Talǵarda 16 jastaǵy Sherzat Bolat qaitys boldy. Bul qaza qoǵamda úlken narazylyq týǵyzdy. Marqumnyń týystary men jergilikti turǵyndar ádil tergeýdi talap etip, narazylyq sharasyn uiymdastyrǵan edi. 12 qazan kúni marqumnyń otbasy turǵan úi qasaqana órtelgeni habarlandy. Keiin Bas prokýratýra da órttiń ádeii uiymdastyrylǵanyn málimdedi. Jergilikti bilik otbasyǵa ýaqytsha baspana men kúzet berip, úidi qalpyna keltirýge ýáde etti.
Oqiǵaǵa qatysty ishki ister ministriniń orynbasary Baýyrjan Alenov pen Almaty oblysynyń prokýrory Berik Adamov kinálilerdi anyqtaý sharalaryn qolǵa alǵandaryn málimdegen edi. Talǵarda qoǵamdyq tártipti saqtaý úshin Ulttyq ulan jasaqtary tartyldy.
9 jeltoqsan kúni marqum Sherzat Bolattyń janynda bolǵan ákesiniń inisi óli tabyldy. Politsiia onyń ózine qol jumsaǵanyn habarlady.
Al 2025 jyldyń 5 maýsymynda Jetisý oblysynyń qylmystyq ister jónindegi mamandandyrylǵan aýdanaralyq soty Sherzat Polattyń ólimine qatysty aiyptalǵan 9 sottalýshyǵa úkim shyǵardy. Sot protsesin sýdia Erjan Januzaqov júrgizdi.
