Sherzat isine qatysty sot otyrystary sońyna taiap keledi. Keshe memlekettik aiyptaýshylar kúdiktilerdi qansha jylǵa sottaýdy suraǵany belgili boldy. Bul týraly sarapshylar ne deidi? Dalanews.kz materialynda.
Prokýrorlardyń ustanymy qandai?
Keshe barlyq mán-jaidy eskere otyryp, prokýror Dana Sársenbai sottan aiyptalýshylarǵa mynadai úkim shyǵarýdy surady:
- Abzal Shynasyl - 23 jylǵa bas bostandyǵynan aiyrý;
- Ravil Sakiev - 20 jylǵa bas bostandyǵynan aiyrý;
- Azamat Toqtaýbaev - 15 jylǵa bas bostandyǵynan aiyrý;
- Nurqiias Iliiasov - 9 jylǵa bas bostandyǵynan aiyrý;
- Shyńǵys Belǵojaev - 7 jylǵa bas bostandyǵynan aiyrý;
- Nurbol Toqtaýbaev - 7 jylǵa bas bostandyǵynan aiyrý;
- Darhan Áskentai - 7 jylǵa bas bostandyǵynan aiyrý;
- Didar Qaliahmet - 7 jylǵa bas bostandyǵynan aiyrý;
- Dýman Ysqaq - 1 jyl 6 aiǵa bas bostandyǵynan aiyrý.
Sarapshy pikiri
Belgili advokat Johar Ótebekov áleýmettik jelide marqum Sherzat Bolat isine qatysty pikir bildirdi.
"Skrinde Belǵojaev ólim aýzynda jatqan Sherzattyń basynan teýip jatqany kórinedi. Iliiasov onyń basynan myltyqtyń sabymen urǵan. ...Olarǵa bar bolǵany 7 jyl ǵana suralyp otyr. Sondai-aq, bárin bastaǵan Áskentai men Nurbolǵa da 7 jyl suraldy. Biraq bul 7 jyldy shartty túrde, iaǵni jaqsy tártip kórsetse, úshten bir bóligin ótep shyqsa bolady. Bul degenimiz - bar bolǵany 2 jyl 4 ai! Tergeý izoliatorynda (SIZO) 1 kún 1,5 kún bolyp esepteledi. Demek "buzaqylar" kelesi jyly bostandyqqa shyǵýy múmkin. Jamandyq jeńdi!" - degen boljam jasady advokat.
Aita keteiik, buǵan deiin advokat oqiǵa ornynda 15 adam bolǵanymen, tek bir adam kisi óltirdi dep aiyptalyp otyrǵanyn málimdedi.
Advokattyń málimetinshe, tergeý barysynda 13 adam kúdikke ilinip, 11-i qamaýǵa alynǵan. Alaida sotqa tek 9 adam jetkizilip, olardyń ishinde kisi óltirý boiynsha naqty aiyp tek bir adamǵa taǵylǵan. Qalǵandaryna "buzaqylyq" baby boiynsha is qozǵalǵan.
Sherzat Bolattyń ólimi týraly ne belgili?
Eske salaiyq, byltyr Talǵarda jappai tóbeles bolyp, saldarynan 16 jastaǵy jasóspirim Sherzat Bolat kóz jumdy.
Kámeletke tolmaǵan balany óltirý deregi boiynsha Almaty oblysynyń Politsiia departamenti qylmystyq is qozǵady. Sondai-aq, olardyń úii órtenip ketti.
Kóp uzamai, iaǵni 9 jeltoqsanda marqum Sherzat Bolattyń aǵasy Nurǵanat Ǵaiypbaev ajal qushty. Politsiia departamenti aldyn ala derekter boiynsha ol sýitsid jasaǵanyn málimdedi. Oǵan dálel retinde politseiler Nurǵanattyń týysyna messendjer arqyly jazǵan hatyn jariia etti.
Al marqum Sherzattyń ákesi baýyry Nurǵanat Ǵaiypbaevty jer qoinyna tapsyrǵanan keiin buqaralyq aqparat quraldarymen kezdesýdi talap etip, kóshege shyqty. Alaida araǵa uzaq ýaqyt salmai Qarjaýbai Nurymovty politsiia qyzmetkerleri ustap áketti. Artynsha Sherzat Bolattyń ápkesi qamaýǵa alyndy. Keiin Qarjaýbai Nurymov 15 táýlikke ákimshilik qamaýǵa alyndy.
