شەرزات ىسىنە قاتىستى سوت وتىرىستارى سوڭىنا تاياپ كەلەدى. كەشە مەملەكەتتىك ايىپتاۋشىلار كۇدىكتىلەردى قانشا جىلعا سوتتاۋدى سۇراعانى بەلگىلى بولدى. بۇل تۋرالى ساراپشىلار نە دەيدى؟ Dalanews.kz ماتەريالىندا.
پروكۋرورلاردىڭ ۇستانىمى قانداي؟
كەشە بارلىق ءمان-جايدى ەسكەرە وتىرىپ، پروكۋرور دانا سارسەنباي سوتتان ايىپتالۋشىلارعا مىناداي ۇكىم شىعارۋدى سۇرادى:
- ابزال شىناسىل - 23 جىلعا باس بوستاندىعىنان ايىرۋ؛
- راۆيل ساكييەۆ - 20 جىلعا باس بوستاندىعىنان ايىرۋ؛
- ازامات توقتاۋبايەۆ - 15 جىلعا باس بوستاندىعىنان ايىرۋ؛
- نۇرقياس ءىلياسوۆ - 9 جىلعا باس بوستاندىعىنان ايىرۋ؛
- شىڭعىس بەلعوجايەۆ - 7 جىلعا باس بوستاندىعىنان ايىرۋ؛
- نۇربول توقتاۋبايەۆ - 7 جىلعا باس بوستاندىعىنان ايىرۋ؛
- دارحان اسكەنتاي - 7 جىلعا باس بوستاندىعىنان ايىرۋ؛
- ديدار قالياحمەت - 7 جىلعا باس بوستاندىعىنان ايىرۋ؛
- دۋمان ىسقاق - 1 جىل 6 ايعا باس بوستاندىعىنان ايىرۋ.
ساراپشى پىكىرى
بەلگىلى ادۆوكات جوحار وتەبەكوۆ الەۋمەتتىك جەلىدە مارقۇم شەرزات بولات ىسىنە قاتىستى پىكىر ءبىلدىردى.
"سكريندە بەلعوجايەۆ ءولىم اۋزىندا جاتقان شەرزاتتىڭ باسىنان تەۋىپ جاتقانى كورىنەدى. ءىلياسوۆ ونىڭ باسىنان مىلتىقتىڭ سابىمەن ۇرعان. ...ولارعا بار بولعانى 7 جىل عانا سۇرالىپ وتىر. سونداي-اق، ءبارىن باستاعان اسكەنتاي مەن نۇربولعا دا 7 جىل سۇرالدى. ءبىراق بۇل 7 جىلدى شارتتى تۇردە، ياعني جاقسى ءتارتىپ كورسەتسە، ۇشتەن ءبىر بولىگىن وتەپ شىقسا بولادى. بۇل دەگەنىمىز - بار بولعانى 2 جىل 4 اي! تەرگەۋ يزولياتورىندا (سيزو) 1 كۇن 1،5 كۇن بولىپ ەسەپتەلەدى. دەمەك "بۇزاقىلار" كەلەسى جىلى بوستاندىققا شىعۋى مۇمكىن. جاماندىق جەڭدى!" - دەگەن بولجام جاسادى ادۆوكات.
ايتا كەتەيىك، بۇعان دەيىن ادۆوكات وقيعا ورنىندا 15 ادام بولعانىمەن، تەك ءبىر ادام كىسى ءولتىردى دەپ ايىپتالىپ وتىرعانىن مالىمدەدى.
ادۆوكاتتىڭ مالىمەتىنشە، تەرگەۋ بارىسىندا 13 ادام كۇدىككە ءىلىنىپ، 11ء-ى قاماۋعا الىنعان. الايدا سوتقا تەك 9 ادام جەتكىزىلىپ، ولاردىڭ ىشىندە كىسى ءولتىرۋ بويىنشا ناقتى ايىپ تەك ءبىر ادامعا تاعىلعان. قالعاندارىنا "بۇزاقىلىق" بابى بويىنشا ءىس قوزعالعان.
شەرزات بولاتتىڭ ءولىمى تۋرالى نە بەلگىلى؟
ەسكە سالايىق، بىلتىر تالعاردا جاپپاي توبەلەس بولىپ، سالدارىنان 16 جاستاعى ءجاسوسپىرىم شەرزات بولات كوز جۇمدى.
كامەلەتكە تولماعان بالانى ءولتىرۋ دەرەگى بويىنشا الماتى وبلىسىنىڭ پوليسيا دەپارتامەنتى قىلمىستىق ءىس قوزعادى. سونداي-اق، ولاردىڭ ءۇيى ورتەنىپ كەتتى.
كوپ ۇزاماي، ياعني 9 جەلتوقساندا مارقۇم شەرزات بولاتتىڭ اعاسى نۇرعانات عايىپبايەۆ اجال قۇشتى. پوليسيا دەپارتامەنتى الدىن الا دەرەكتەر بويىنشا ول سۋيسيد جاساعانىن مالىمدەدى. وعان دالەل رەتىندە پوليسەيلەر نۇرعاناتتىڭ تۋىسىنا مەسسەندجەر ارقىلى جازعان حاتىن جاريا ەتتى.
ال مارقۇم شەرزاتتىڭ اكەسى باۋىرى نۇرعانات عايىپبايەۆتى جەر قوينىنا تاپسىرعانان كەيىن بۇقارالىق اقپارات قۇرالدارىمەن كەزدەسۋدى تالاپ ەتىپ، كوشەگە شىقتى. الايدا اراعا ۇزاق ۋاقىت سالماي قارجاۋباي نۇرىموۆتى پوليسيا قىزمەتكەرلەرى ۇستاپ اكەتتى. ارتىنشا شەرزات بولاتتىڭ اپكەسى قاماۋعا الىندى. كەيىن قارجاۋباي نۇرىموۆ 15 تاۋلىككە اكىمشىلىك قاماۋعا الىندى.
