Búgin Sherzat Bolattyń ólimine bailanysty sot otyrysynda kúdiktiler sóz sóiledi, dep habarlaidy Dalanews.kz.
Sot otyrysynda alǵashqy bolyp sóilegen sottalýshy Darhan Áskentai oqiǵa kezinde marqum Sherzatpen tóbelesip qalǵanyn, sodan keiin dostaryn kómekke shaqyrǵanyn aitty. Ol bul áreketine ókinish bildirip, sol jerde bolǵanyn jáne telefon shalǵanyn rastady. Áskentai óz áreketin beinematerial arqyly baǵalaýǵa bolatynyn, eshkimge qol kótermegenin, teppegenin jáne qolynda pyshaq bolmaǵanyn málimdedi. Ol dosy Nurboldy shaqyrǵanyna ókinip, tóbeles bolatynyn bilmegenin jetkizdi. Sondai-aq, oqiǵaǵa sebepker bolǵan Qarjaýbai týraly jalǵan aqparat berilgenin, balalar kelgende ol pyshaq shyǵaryp, agressiia tanytpaǵanda jáne Sherzat olardy urmaǵan jaǵdaida mundai jaǵdai oryn almas edi dep sanaitynyn aitty. Áskentai tóbelesti bastaǵan jáne pyshaq pen qarý qoldanǵan Qarjaýbaidyń Qylmystyq kodekstiń 293-babymen sottalýyn surady.
Sottalýshy Ravil Sákiev jábirlenýshi taraptan jáne Nurqanattyń ájesinen shyn júrekten keshirim suraitynyn aitty. Ol tergeý men sot barysynda Nurqanatty eki-úsh ret tepkenin moiyndady jáne istegen isine ókinetinin jetkizdi. Sákiev ózine QK 293-bap, 24-bap jáne 99-bap boiynsha aiyp taǵylǵanyn aitty. Ol Nurqanattyń alǵashqy jaýaptarynda pyshaqty basqa adamdar saldy degenin, al bettestirý kezinde ony 2017 jyldan beri tanitynyn málimdegenin keltirdi. Óziniń aty tergeý kezinde atalǵanyn, biraq bettestirýge deiin 22-23 kún boiy aitylmaǵanyn atap ótti.
Ol Qarjaýbaidyń óz kinásin moiyndaǵanyn jáne ol úshin alǵys aitatynyn aitty. Sákiev taǵylǵan aiyppen kelispeitinin, tek tepkenin ǵana moiyndaitynyn jáne óz áreketi úshin tek 293-bappen qaraýdy suraitynyn málimdedi.
Nurbol Toqtaýbaev sózin jábirlenýshi taraptan keshirim suraýmen bastady. Ol marqumǵa Alladan raqym tilep, tergeý barysynda kinásin jartylai moiyndaitynyn aitty. Toqtaýbaevtyń aitýynsha, onyń eshqandai qylmys jasaý nieti bolmaǵan, tek Darhan kómek suraǵannan keiin barǵan. Ol tek ekeýin tatýlastyryp, Darhandy alyp ketýdi ǵana oilaǵanyn, týǵan baýyry Azamat pen Shyńǵysty ǵana shaqyrǵanyn málimdedi. Óziniń jábirlenýshi Nurymovty sabyrǵa shaqyrǵanyn, qaqtyǵysty boldyrmaýǵa tyrysqanyn aitty. Qarýly bolǵanyn teriske shyǵaryp, tóbeles kezinde Ǵaiypbaev myltyq atqannan keiin eki ret tepkenin jáne bul úshin keshirim suraitynyn jetkizdi. Ol ózine taǵylǵan QK 293-baptyń 3-bóligimen kelispeitinin, Sherzattyń ólimine Nurymov Qarjaýbaidy kináli dep tanyp, oǵan qatysty qylmystyq is qozǵaýdy surady.
Azamat Toqtaýbaev óz sózinde sýdiaǵa tyńdaǵany úshin alǵys bildirdi. Ol oqiǵa túni úiinde bolǵanyn, úiqamaqta otyrǵanyn jáne dárihanaǵa barý qajettiligi týǵanyn aitty. Shyńǵyspen Talǵarǵa barmaq bolyp, jolda Nurqiiastyń habarlasqanyn, ony alyp ketýge barǵanyn jetkizdi. Toqtaýbaev buzaqylyq jasaýǵa nieti bolmaǵanyn, tóbeles pen pyshaq týraly eshteńe bilmegenin aitty. Bettestirý kezinde Nurqanattyń tergeýshiniń «Azamattyń qolynan ne kórdiń?» degen suraǵyna «babochka» dep jaýap bergenin, al prokýrordyń «as pyshaǵy» dep kórsetkenin, muny túsinbeitinin málimdedi.
Ol ózine jala jabylǵanyn sezetinin, 7 jylǵa sottalýyn ómir boiyna sottalǵanmen teń sanaitynyn, bul oqiǵany úlken sabaq retinde qabyldaǵanyn, istegen isine ókinetinin, bir jasqa tolmaǵan balasy men úide otyrǵan jary baryn aityp, sottan ádildik surady.
Kámeletke tolmaǵan Dýman Ysqaq advokatynyń sózin tolyq qoldaitynyn, 4 qazanda túste ǵana oqiǵany bilgenin, sottalýshylardy burynnan tanitynyn jáne ózin aqtaýdy suraitynyn málimdedi.
Shyńǵys Belǵojaev bolǵan jaǵdaiǵa bailanysty jábirlenýshilerden keshirim surady. Ol oqiǵaǵa qasaqana barǵanyn joqqa shyǵaryp, mundai jaǵdai bolatynyn bilmegenin aitty. Eger olardy myltyqpen kútip otyrǵanyn bilgende, barmaityn edik dedi. Ol Qarjaýbaidyń “Shyńǵys meni pyshaqpen qýalady” degeni jalǵan ekenin aityp, mundai jaǵdai bolmaǵanyn, ózin bári bákiniń sabymen uryp jatyr dep oilaǵanyn, al shyn máninde qol jaraqatynan judyryqpen soǵa almaǵandyqtan, qolynyń shetimen urǵanyn túsindirdi. Ol Sherzat pen Qarjaýbaidyń áreketteri bolmaǵanda, bul jaǵdai da bolmas edi dep sanaitynyn aitty. Belǵojaev Qarjaýbaidy QK 293-babymen jaýapqa tartýdy surap, 660 mln teńgelik ótemaqyny tóleýge toǵyz adamnyń ómir boiy múmkindigi joq ekenin, ótinishhatty qanaǵattandyrmaýdy surady.
Nurqiias Iliiasov ta Qarjaýbai men marqumnyń anasynan shyn júrekten keshirim surap, oqiǵaǵa barǵanyna ókinetinin aitty. Ol Sherzattyń ózin urǵanyn, al aǵasynyń myltyq atqanyn, ózi sóilesý úshin ǵana barǵanyn, eshqandai soǵysý nemese qylmys nieti bolmaǵanyn málimdedi. Iliiasov sottan ádil jaza surap, Sherzatqa qol tigizbegenin, tek Nurqanatty urǵanyn moiyndady.
Didar Qaliahmet tóbelesti toqtatpaǵany úshin keshirim surap, segiz ai boiy ata-anasy men jaryna qiyndyq týǵyzǵanyn aitty. Ol prokýrorlardyń aiyptaý aktisin ózgertpegenin, ózi tóbeleske qatyspaǵanyn jáne dálelder bolmaǵanyn aityp, sottan ádil sheshim surady.
Basty aiyptalýshy Abzal Shynasyl sotta Qarjaýbaidyń otbasynan keshirim surady. Ol bul jaǵdaidyń Allanyń synaǵy ekenin aityp, Sherzatty óltirse birden moiyndaitynyn, shyndyqty aitqanyn jetkizdi. Óz jaýabyn ne úshin ózgertkenin túsindirip, jalǵyz qateligi — namysqa berilip, kináni óz moinyna alǵany ekenin aitty. Ol jazadan qoryqpaitynyn, ádil sheshim suraitynyn málimdedi.
QK 106-babymen jaza taǵaiyndaýdy surap, barsha qazaq halqynan keshirim surady. BAQ pen áleýmettik jelilerde aitylyp júrgen «baidyń balasy, depýtattyń balasy» degen sózderdi joqqa shyǵaryp, jalǵyz anasy baryn aitty. Sherzatty óltirgen ózi emes ekenin, kimdiki ekenin aita almaitynyn aityp sózin qorytyndylady.
