Sherzat Bolattyń ólimi boiynsha basty kúdik Abzal Shynasyl sotta jaýap bere bastady, dep habarlaidy Dalanews.kz.
Abzal taǵylǵan aiypty jartylai moiyndaitynyn aitty.
Aiyptalýshy Abzal Shynasyldyń aitýynsha, oqiǵa bolǵan kúni ol dostary – Azamat Toqtaýbaev, Shyńǵys Belgojaev, Ravil Sakiev jáne kámelet jasqa tolmaǵan D.Y.-men birge kafede demalyp otyrǵan. Sol kezde oǵan Nurbol Toqtaýbaev qońyraý shalyp, "Qamajai" dúkeni mańynda dosyn bireýler soqqyǵa jyqqanyn habarlaǵan.
Abzaldyń sózinshe, ol oqiǵa ornyna kelgende, tóbeles bastalyp ketken eken. Ol sondai-aq Sherzattyń aǵasy – Nurǵanat Ǵaiypbaevtyń ózine qarai myltyqpen oq atqanyn aitty.
«Sodan keiin olar Sherzatpen birge Shota Rýstaveli kóshesimen qashyp ketti. Keiin Sherzat qulap tústi. Ol qulaǵan kezde men ony uryp, teptim. Sosyn men Nurǵanatty úsh ret pyshaqtadym. Muny moiyndaimyn», – dedi Abzal Shynasyl.
Sot barysynda Abzaldan ne úshin pyshaqty ózimen birge alyp júrgeni suralǵanda, ol oqiǵadan úsh kún buryn janarmai beketinde belgisiz úsh adam shabýyl jasaǵanyn, sol sebepti ózimen birge pyshaq alyp júrgenin aitqan.
Alaida sotta Abzal Shynasyl burynǵy aitqan sózderinen bas tartty. Onyń aitýynsha, Sherzatty óltirgen ol emes jáne pyshaqty kim qoldanǵanyn bilmeidi.
«Politsiiada maǵan Sherzatty men pyshaqtadym dep moiyndatty. Keiin bizdi Qonaevqa etappen apara jatqanda – men, Ravil, Shyńǵys jáne Azamat kelisip aldyq: men Sherzatqa qatysty kináni óz moinyma alamyn, al Nurǵanatqa qatysty kináni Shyńǵys moinyna alady dep. Men kináni moinyma alsam, jazam jeńil bolady dep oiladym», – dedi Shynasyl.
Keiin sotta Sherzattyń aǵasy Nurǵanat Ǵaiypbaev pen Abzal Shynasyl arasyndaǵy bettestirýdiń beinejazbasy kórsetildi. Bettestirý kezinde Nurǵanat Ǵaiypbaev tóbeles kezinde pyshaq Abzaldyń qolynda bolǵanyn jáne sol pyshaqpen Sherzatty jaraqattaǵanyn málimdedi.
