شەرزات بولاتتىڭ ءولىمى بويىنشا باستى كۇدىك ابزال شىناسىل سوتتا جاۋاپ بەرە باستادى، دەپ حابارلايدى Dalanews.kz.
ابزال تاعىلعان ايىپتى جارتىلاي مويىندايتىنىن ايتتى.
ايىپتالۋشى ابزال شىناسىلدىڭ ايتۋىنشا، وقيعا بولعان كۇنى ول دوستارى – ازامات توقتاۋبايەۆ، شىڭعىس بەلگوجايەۆ، راۆيل ساكييەۆ جانە كامەلەت جاسقا تولماعان د.ى.-مەن بىرگە كافەدە دەمالىپ وتىرعان. سول كەزدە وعان نۇربول توقتاۋبايەۆ قوڭىراۋ شالىپ، "قاماجاي" دۇكەنى ماڭىندا دوسىن بىرەۋلەر سوققىعا جىققانىن حابارلاعان.
ابزالدىڭ سوزىنشە، ول وقيعا ورنىنا كەلگەندە، توبەلەس باستالىپ كەتكەن ەكەن. ول سونداي-اق شەرزاتتىڭ اعاسى – نۇرعانات عايىپبايەۆتىڭ وزىنە قاراي مىلتىقپەن وق اتقانىن ايتتى.
«سودان كەيىن ولار شەرزاتپەن بىرگە شوتا رۋستاۆەلي كوشەسىمەن قاشىپ كەتتى. كەيىن شەرزات قۇلاپ ءتۇستى. ول قۇلاعان كەزدە مەن ونى ۇرىپ، تەپتىم. سوسىن مەن نۇرعاناتتى ءۇش رەت پىشاقتادىم. مۇنى مويىندايمىن»، – دەدى ابزال شىناسىل.
سوت بارىسىندا ابزالدان نە ءۇشىن پىشاقتى وزىمەن بىرگە الىپ جۇرگەنى سۇرالعاندا، ول وقيعادان ءۇش كۇن بۇرىن جانارماي بەكەتىندە بەلگىسىز ءۇش ادام شابۋىل جاساعانىن، سول سەبەپتى وزىمەن بىرگە پىشاق الىپ جۇرگەنىن ايتقان.
الايدا سوتتا ابزال شىناسىل بۇرىنعى ايتقان سوزدەرىنەن باس تارتتى. ونىڭ ايتۋىنشا، شەرزاتتى ولتىرگەن ول ەمەس جانە پىشاقتى كىم قولدانعانىن بىلمەيدى.
«پوليسيادا ماعان شەرزاتتى مەن پىشاقتادىم دەپ مويىنداتتى. كەيىن ءبىزدى قونايەۆقا ەتاپپەن اپارا جاتقاندا – مەن، راۆيل، شىڭعىس جانە ازامات كەلىسىپ الدىق: مەن شەرزاتقا قاتىستى كىنانى ءوز موينىما الامىن، ال نۇرعاناتقا قاتىستى كىنانى شىڭعىس موينىنا الادى دەپ. مەن كىنانى موينىما السام، جازام جەڭىل بولادى دەپ ويلادىم»، – دەدى شىناسىل.
كەيىن سوتتا شەرزاتتىڭ اعاسى نۇرعانات عايىپبايەۆ پەن ابزال شىناسىل اراسىنداعى بەتتەستىرۋدىڭ بەينەجازباسى كورسەتىلدى. بەتتەستىرۋ كەزىندە نۇرعانات عايىپبايەۆ توبەلەس كەزىندە پىشاق ابزالدىڭ قولىندا بولعانىن جانە سول پىشاقپەن شەرزاتتى جاراقاتتاعانىن مالىمدەدى.
