Sherzat Polattyń ólimine qatysty ótip jatqan sot protsesinde jábirlenýshi taraptyń advokaty Baǵdagúl Ájiǵalieva sottalýshylarǵa taǵylǵan aiypty aýyrlatýdy surady. Onyń aitýynsha, Sherzattyń ólimine tek negizgi aiyptalýshy Abzal Shynasyl ǵana emes, basqa da qatysýshylar tikelei sebepker bolǵan, dep habarlaidy Dalanews.kz.
Advokattyń sózine qaraǵanda, sotta jaýap bergen sarapshylar Sherzattyń keýde tusyna tigen pyshaq jaraqaty saldarynan kóp qan joǵaltyp kóz jumǵanyn naqtylaǵan. Eger oqiǵa ornynda der kezinde meditsinalyq kómek kórsetilip, qan joǵaltýdyń ornyn toltyrý múmkindigi bolsa, onyń ómirin saqtap qalýǵa bolar edi.
Soǵan qaramastan, tergeý organdary pyshaq salý áreketin tek Shynasyldyń moinyna júktep, qalǵan sottalýshylarǵa tek «buzaqylyq» babymen aiyp taǵyp otyr. Advokat Ájiǵalieva buǵan kelispeitinin bildirip, Sherzattyń álsirep, jerde qansyrap jatqan sátinde anasy men aǵasy jedel járdem shaqyryp, uryp-soǵýǵa qarsylyq bildirgenimen, Darhan Áskentai, Nurbol Toqtaýbaev, Shyńǵys Belǵojaev, Nurqiias Iliiasov jáne Ravil Sakievtiń oǵan birneshe ret qol-aiaǵymen soqqy jasaǵanyn alǵa tartty.
Osyny negizge ala otyryp, advokat Sherzattyń jaraqat alýyna tikelei qatysy bar dep tanylǵan Áskentai, Toqtaýbaev, Belǵojaev, Iliiasovqa taǵylǵan Qylmystyq kodekstiń 293-baby 3-bóligin (buzaqylyq) 24-baptyń 3-bóligi jáne 99-baptyń 2-bóliginiń 3,5,7,9-tarmaqtaryna, iaǵni toptasqan túrde, asa qatigezdikpen, buzaqylyq nietpen, jábirlenýshiniń dármensiz kúide ekenin bile tura adam óltirýge oqtalý babyna aýystyrý qajet degen usynys jasady. Al Sakievke bul aiypty odan da aýyr nusqada – eki nemese odan da kóp adamǵa qatysty jasalǵan osyndai qylmys retinde saralaý keregin aitty.
Aita keteiik, Sakievtiń ózi qazirdiń ózinde QK-niń 293-baby 3-bóligi jáne 99-baptyń 2-bóligi 7 jáne 9-tarmaqtary boiynsha (adam óltirýge oqtalý) aiyptalyp otyr.
Advokattyń bul ótinishin memlekettik aiyptaýshylar qoldamaýdy surady. Al Shynasyldyń qorǵaýshysy Ábenov ótinishti qoldap, klientiniń bul iske aldaný arqyly tartylǵanyn jáne jaýapkershiliktiń barlyǵyn jalǵyz oǵan artyp otyrǵanyn jetkizdi. Qalǵan aiyptalýshylardyń advokattary aiyptaýdy qaita qaraýǵa negiz joq dep esepteidi.
Sýdia Erjan Januzaqov memlekettik aiyptaýshylardyń jańa aiyptaý aktisin ázirleý úshin ýaqyt suramaǵanyna súiene otyryp, jábirlenýshi taraptyń ótinishin qanaǵattandyrýdan bas tartty.
