شەرزات پولاتتىڭ ولىمىنە قاتىستى ءوتىپ جاتقان سوت پروسەسىندە جابىرلەنۋشى تاراپتىڭ ادۆوكاتى باعداگۇل اجىعالييەۆا سوتتالۋشىلارعا تاعىلعان ايىپتى اۋىرلاتۋدى سۇرادى. ونىڭ ايتۋىنشا، شەرزاتتىڭ ولىمىنە تەك نەگىزگى ايىپتالۋشى ابزال شىناسىل عانا ەمەس، باسقا دا قاتىسۋشىلار تىكەلەي سەبەپكەر بولعان، دەپ حابارلايدى Dalanews.kz.
ادۆوكاتتىڭ سوزىنە قاراعاندا، سوتتا جاۋاپ بەرگەن ساراپشىلار شەرزاتتىڭ كەۋدە تۇسىنا تيگەن پىشاق جاراقاتى سالدارىنان كوپ قان جوعالتىپ كوز جۇمعانىن ناقتىلاعان. ەگەر وقيعا ورنىندا دەر كەزىندە مەديسينالىق كومەك كورسەتىلىپ، قان جوعالتۋدىڭ ورنىن تولتىرۋ مۇمكىندىگى بولسا، ونىڭ ءومىرىن ساقتاپ قالۋعا بولار ەدى.
سوعان قاراماستان، تەرگەۋ ورگاندارى پىشاق سالۋ ارەكەتىن تەك شىناسىلدىڭ موينىنا جۇكتەپ، قالعان سوتتالۋشىلارعا تەك «بۇزاقىلىق» بابىمەن ايىپ تاعىپ وتىر. ادۆوكات اجىعالييەۆا بۇعان كەلىسپەيتىنىن ءبىلدىرىپ، شەرزاتتىڭ السىرەپ، جەردە قانسىراپ جاتقان ساتىندە اناسى مەن اعاسى جەدەل جاردەم شاقىرىپ، ۇرىپ-سوعۋعا قارسىلىق بىلدىرگەنىمەن، دارحان اسكەنتاي، نۇربول توقتاۋبايەۆ، شىڭعىس بەلعوجايەۆ، نۇرقياس ءىلياسوۆ جانە راۆيل ساكييەۆتىڭ وعان بىرنەشە رەت قول-اياعىمەن سوققى جاساعانىن العا تارتتى.
وسىنى نەگىزگە الا وتىرىپ، ادۆوكات شەرزاتتىڭ جاراقات الۋىنا تىكەلەي قاتىسى بار دەپ تانىلعان اسكەنتاي، توقتاۋبايەۆ، بەلعوجايەۆ، ءىلياسوۆقا تاعىلعان قىلمىستىق كودەكستىڭ 293-بابى 3-بولىگىن (بۇزاقىلىق) 24-باپتىڭ 3-بولىگى جانە 99-باپتىڭ 2-بولىگىنىڭ 3،5،7،9-تارماقتارىنا، ياعني توپتاسقان تۇردە، اسا قاتىگەزدىكپەن، بۇزاقىلىق نيەتپەن، جابىرلەنۋشىنىڭ دارمەنسىز كۇيدە ەكەنىن بىلە تۇرا ادام ولتىرۋگە وقتالۋ بابىنا اۋىستىرۋ قاجەت دەگەن ۇسىنىس جاسادى. ال ساكييەۆكە بۇل ايىپتى ودان دا اۋىر نۇسقادا – ەكى نەمەسە ودان دا كوپ ادامعا قاتىستى جاسالعان وسىنداي قىلمىس رەتىندە سارالاۋ كەرەگىن ايتتى.
ايتا كەتەيىك، ساكييەۆتىڭ ءوزى ءقازىردىڭ وزىندە قك-نىڭ 293-بابى 3-بولىگى جانە 99-باپتىڭ 2-بولىگى 7 جانە 9-تارماقتارى بويىنشا (ادام ولتىرۋگە وقتالۋ) ايىپتالىپ وتىر.
ادۆوكاتتىڭ بۇل ءوتىنىشىن مەملەكەتتىك ايىپتاۋشىلار قولداماۋدى سۇرادى. ال شىناسىلدىڭ قورعاۋشىسى ابەنوۆ ءوتىنىشتى قولداپ، كليەنتىنىڭ بۇل ىسكە الدانۋ ارقىلى تارتىلعانىن جانە جاۋاپكەرشىلىكتىڭ بارلىعىن جالعىز وعان ارتىپ وتىرعانىن جەتكىزدى. قالعان ايىپتالۋشىلاردىڭ ادۆوكاتتارى ايىپتاۋدى قايتا قاراۋعا نەگىز جوق دەپ ەسەپتەيدى.
سۋديا ەرجان جانۇزاقوۆ مەملەكەتتىك ايىپتاۋشىلاردىڭ جاڭا ايىپتاۋ اكتىسىن ازىرلەۋ ءۇشىن ۋاقىت سۇراماعانىنا سۇيەنە وتىرىپ، جابىرلەنۋشى تاراپتىڭ ءوتىنىشىن قاناعاتتاندىرۋدان باس تارتتى.
