Sherzat Bolattyń týystary turatyn úidegi órtten keiin ákimdik baspana qalpyna keltiriledi dep ýáde etken. Alaida qazir Eńbekshiqazaq aýdanynyń ákimdigi biýdjette mundai shyǵyn qarastyrylmaǵanyn málimdep otyr, dep habarlaidy Dalanews.kz.
«Qazirgi ýaqytta aýdandyq biýdjette, ókinishke qarai, órtten zardap shekken Qarjaýbai Nurymovtyń úiin qalpyna keltirýge nemese jańa baspana salýǵa qarajat qarastyrylmaǵan», – dep jaýap bergen ákimdik "Za nami vyehali" telegram arnasyna.
Soǵan qaramastan, ákimdiktegiler demeýshilerdi tartý joldaryn qarastyryp jatqanyn aitty. Eger ondai múmkindik tabylyp, «qajettilik rastalsa», bul másele qosymsha qarastyrylýy múmkin ekenin jetkizdi.
Budan da mańyzdy bir jait – Eńbekshiqazaq aýdanynyń ákimdigi málimetinshe, Qarjaýbai Nurymovtyń otbasy tarapynan resmi túrde materialdyq kómek suraý, múlikti qalpyna keltirý nemese turǵyn úimen qamtamasyz etý týraly ótinish túspegen.
Eske salaiyq, buǵan deiin Talǵardaǵy jappai tóbeles kezinde qaza tapqan Sherzat Bolattyń úiiniń órtenýine bailanysty Bas prokýratýra málimdeme jasaǵan bolatyn.
Bas prokýratýranyń baspasóz qyzmetiniń málimetinshe, Talǵarda jasóspirimdi óltirý isi boiynsha jábirlenýshilerdiń úiin órteý faktisine qatysty 2024 jylǵy 12 qazanda Bas prokýratýranyń basshylyǵymen qylmysty ashý úshin vedomstvoaralyq jedel-tergeý toby quryldy.
Kinálilerdi áshkereleý úshin barlyq sharalar qabyldanatyn bolady. Qylmystyq is Qazaqstan Respýblikasy Bas Prokýrorynyń baqylaýyna alyndy.
Aita keteiik, 12 qazanǵa qaraǵan túni Talǵar tragediiasynda qaza tapqan Sherzat Bolattyń úii órtenip ketti. Bul týraly áleýmettik jelide habarlana bastady.
Zardap shekkender men qaza tapqandar joq. Kýágerlerdiń sózinshe, úi tutas órtenip ketken.
Bul derekke Politsiia departamenti jaýap berdi. 12 qazanǵa qaraǵan túni Eńbekshiqazaq aýdany Azat aýylyndaǵy úilerdiń birinde órt boldy.
Bótenniń múlkin qasaqana joiý deregi boiynsha politsiia qylmystyq is qozǵady.
