Búgin Abai oblysynyń ákimi Berik Ýálidiń tóraǵalyǵymen keńeitilgen apparattyq jiyn ótti. Qala jáne aýdan ákimderi beine rejimde qatysqan otyrysta Abai oblysynyń 1-toqsandaǵy áleýmettik-ekonomikalyq damýynyń qorytyndylary jáne biýdjet qarajatyn igerý, «Aýyldyq densaýlyq saqtaýdy jańǵyrtý» ulttyq jobasynyń iske asyrylý barysy talqylandy,- dep habarlaidy Dalanews.kz
Jiynda Densaýlyq saqtaý jáne Qurylys basqarmalarynyń basshylary baiandama jasady.
Oblystyq Densaýlyq saqtaý basqarmasynyń basshysy Talǵat Moldabekovtiń málimetinshe, «Aýyldyq densaýlyq saqtaýdy jańǵyrtý» ulttyq jobasy aiasynda 2023–2025 jyldary óńirde 65 alǵashqy meditsinalyq-sanitarlyq kómek kórsetý nysanyn salý josparlanǵan. Byltyr sonyń 62-siniń qurylysy aiaqtalyp, paidalanýǵa berý aktileri rásimdelgen. Alaida meditsinalyq mekemelerdiń kópshiligi halyqqa qyzmet kórsetýge tolyq daiyn emes. Abattandyrý jumystary aiaqtalmaǵan, meditsinalyq qural-jabdyqtar ornatylmaǵan. Jihazdar tolyq jetkizilmegen. Keibir ǵimarattardyń shatyrynan sý aǵyp, ishki qabyrǵalary jaryla bastaǵan. Qazirgi ýaqytta 62 nysannyń tek 10-y aýdandyq aýrýhanalardyń qaramaǵyna berilgen.
Jiynda baiandama jasaǵan Qurylys basqarmasynyń basshysy qurylys jumystarynyń aiaqtalýy keste boiynsha qys merzimine kelgendikten, kógaldandyrý, abattandyrý sharalarynyń kóktemge qalǵanyn aitty. Basqarmanyń málimetinshe, qazirgi ýaqytta 22 nysanda abattandyrý jáne syrtqy árleý jumysy júrgizilýde. 17 meditsinalyq mekemede qystan qalǵan syrtqy jumystar men abattandyrý sharalary osy aptada bastalady.
Oblys ákimi óńir halqy qanshama jyldan beri taǵatsyzdana kútip otyrǵan meditsinalyq nysandardyń ýaqytynda paidalanýǵa berilýin baqylamaǵany úshin salaǵa jaýapty orynbasary men Qurylys basqarmasynyń jumysyn synǵa aldy.
«Oryn alǵan jaǵdai joǵaryda atalǵan tulǵalardyń salǵyrt jumysynyń nátijesi dep sanaimyn. Ótken aptada Aiagóz aýdanyna barǵanymda birneshe aýyldyń turǵyndary salynǵan meditsinalyq nysandardyń qurylysyna shaǵymdaryn aitty. Byltyr jyl sońynda qabyldanǵan ǵimarattar nege áli kúnge deiin iske qosylmai otyr? Osyǵan jaýapty Qurylys basqarmasy ne qaraǵan? Bul – halyqqa qyzmet kórsetetin oryndar. Aýdan, aýyl ákimderi ǵimarattar sizderdiń aýmaqtaryńyzda bolǵandyqtan nysandy qabyldaý kezinde qadaǵalaýǵa alý kerek edi. Buǵan sizder de jaýaptysyzdar», - dedi aimaq basshysy.
Oblys ákimi oryn alǵan olqylyqtardy joiý maqsatynda Qurylys basqarmasynyń mamandaryn qurylys júrgizilip jatqan árbir nysanǵa jaýapty retinde bekitip, kúndelikti baqylaý jasaýdy tapsyrdy. Memlekettik sáýlet-qurylys baqylaý basqarmasyna barlyq qurylys nysandaryna baryp, sapasyna keshendi qadaǵalaý júrgizip, qorytyndysyn baiandaý qajettigin aitty. Qurylys jáne tsifrlandyrý basqarmalary birlesip, ár qurylys nysanyna beinebaqylaý kameralaryn ornatý kerek.
«Meditsinalyq nysandardaǵy atqarylmaǵan ishki, syrtqy jumystar tolyq qalpyna keltirilsin. Salaǵa jaýapty oblys ákiminiń orynbasary ár eki apta saiyn qurylys barysy boiynsha arnaiy jinalys ótkizip, jaǵdaidy turaqty qadaǵalaýda ustaýy tiis. Bul másele meniń jeke baqylaýymda bolady», - dedi aimaq basshysy.
