Bul ozat sharýashylyqtyń 2016 jylǵy ónimi orta eseppen 500 sentnerden aınalsa, ótken jyly bul kórsetkish 600 sentnerge jetken. Mundaı tolaıym tabys memlekettiń sharýalarǵa sýbsıdıa, gerbısıd, tyńaıtqysh, tuqym, tehnıka tarapynan qoldaý kórsetýi men qyzylsha ósirýshilerdiń qajyrly eńbeginiń birlesken jemisi. Bul týraly búgin Almaty oblysynyń ákimi Amandyq Batalovtyń Aqsý aýdanyna jasaǵan sapary barysynda aıtyldy.
Búgin Qyzylaǵash aýyldyq okrýgindegi «Kvıtko» sharýa qojalyǵynyń qyzylsha alqabynda bolǵan oblys basshysy A. Batalov aýyl sharýashylyǵy jumystarynyń barysymen tanysty. Alqap basynda aýdannyń agrarlyq salasyndaǵy sharalar týraly baıandaǵan Aqsý aýdanynyń ákimi Á. Dalbaǵaevtyń aıtýynsha, aýdanda 6 servıstik-daıyndaý ortalyǵy bar bolsa, 2018 jyly qant qyzylshasy baǵytynda 3 SDO qurylǵan. Jalpy bul ortalyqtarǵa 51 zamanaýı tehnıka satyp alynyp, ıgiligin sharýalar kórip otyr. Ótken jyly 56800 tonna tátti túbir jınaǵan aqsýlyqtar jerden alar ónimdi bıyl 71 200 tonnaǵa jetkizemiz dep josparlaǵan.
Sharýashylyq jetekshisi Aleksandr Kvıtko Úkimet qoldaýymen alynǵan qant qyzylshasynyń fransýzdyq tuqymynan shyǵatyn ónimniń qanttylyǵy keminde 22% bolatynyn aıtty. Jalpy osy alqaptaǵy 50 gektar jerdiń ónimi orta eseppen 700 sentnerden aınalady dep kútilýde. Úlgi úshin qazyp alynǵan tátti túbirdi tarazyǵa tartqan alqap basyndaǵylar bir túp qyzylshanyń kemi eki keliden tórt kelige deıin tartqanyn kórdi. Eger osy alqaptaǵy ár túbirdiń ortasha salmaǵy osyndaı mólsherde bolsa, kútilip otyrǵan 700 sentner kórsetkishtiń ornyna ónimniń shyǵymdylyǵy 800 sentnerden aınalýy da ǵajap emes. Óz kezeginde oblys basshysy A.Batalov Aqsý aýdanynyń ırrıgasıalyq júıeleri tolyq jóndelip bitkennen keıin sharýalar egis alqaby aınalymyn kóbeıtýge múmkindik alatynyn atap ótti.
Eske salsaq, qazirgi kezde Qyzylaǵash sý qoımasyn qalpyna keltirý jumystary júrip jatyr. Atalmysh nysan iske qosylǵanda aýdan ıgiligine taǵy 7 myń gektar sýarmaly jer aınalymǵa engiziletin bolady. Sonymen qatar Aqsý aýdanynyń ırrıgasıalyq júıelerin jóndeýge bıylǵy jyldyń ózinde 5,9 mlrd. teńge bólinip otyr. Jóndeý jumystarynyń nátıjesinde aqsýlyq sharýalardyń qant qyzylshasymen qatar basqa da daqyldar sebetin alqaptarynyń aýmaǵyn keńeıtýge múmkindik týmaq.
