بۇل وزات شارۋاشىلىقتىڭ 2016 جىلعى ءونىمى ورتا ەسەپپەن 500 سەنتنەردەن اينالسا، وتكەن جىلى بۇل كورسەتكىش 600 سەنتنەرگە جەتكەن. مۇنداي تولايىم تابىس مەملەكەتتىڭ شارۋالارعا سۋبسيديا، گەربيسيد، تىڭايتقىش، تۇقىم، تەحنيكا تاراپىنان قولداۋ كورسەتۋى مەن قىزىلشا وسىرۋشىلەردىڭ قاجىرلى ەڭبەگىنىڭ بىرلەسكەن جەمىسى. بۇل تۋرالى بۇگىن الماتى وبلىسىنىڭ اكىمى اماندىق باتالوۆتىڭ اقسۋ اۋدانىنا جاساعان ساپارى بارىسىندا ايتىلدى.
بۇگىن قىزىلاعاش اۋىلدىق وكرۋگىندەگى «كۆيتكو» شارۋا قوجالىعىنىڭ قىزىلشا القابىندا بولعان وبلىس باسشىسى ا. باتالوۆ اۋىل شارۋاشىلىعى جۇمىستارىنىڭ بارىسىمەن تانىستى. القاپ باسىندا اۋداننىڭ اگرارلىق سالاسىنداعى شارالار تۋرالى بايانداعان اقسۋ اۋدانىنىڭ اكىمى ءا. دالباعايەۆتىڭ ايتۋىنشا، اۋداندا 6 سەرۆيستىك-دايىنداۋ ورتالىعى بار بولسا، 2018 جىلى قانت قىزىلشاسى باعىتىندا 3 سدو قۇرىلعان. جالپى بۇل ورتالىقتارعا 51 زاماناۋي تەحنيكا ساتىپ الىنىپ، يگىلىگىن شارۋالار كورىپ وتىر. وتكەن جىلى 56800 توننا ءتاتتى ءتۇبىر جيناعان اقسۋلىقتار جەردەن الار ءونىمدى بيىل 71 200 تونناعا جەتكىزەمىز دەپ جوسپارلاعان.
شارۋاشىلىق جەتەكشىسى الەكساندر كۆيتكو ۇكىمەت قولداۋىمەن الىنعان قانت قىزىلشاسىنىڭ فرانسۋزدىق تۇقىمىنان شىعاتىن ءونىمنىڭ قانتتىلىعى كەمىندە 22% بولاتىنىن ايتتى. جالپى وسى القاپتاعى 50 گەكتار جەردىڭ ءونىمى ورتا ەسەپپەن 700 سەنتنەردەن اينالادى دەپ كۇتىلۋدە. ۇلگى ءۇشىن قازىپ الىنعان ءتاتتى ءتۇبىردى تارازىعا تارتقان القاپ باسىنداعىلار ءبىر ءتۇپ قىزىلشانىڭ كەمى ەكى كەلىدەن ءتورت كەلىگە دەيىن تارتقانىن كوردى. ەگەر وسى القاپتاعى ءار ءتۇبىردىڭ ورتاشا سالماعى وسىنداي مولشەردە بولسا، كۇتىلىپ وتىرعان 700 سەنتنەر كورسەتكىشتىڭ ورنىنا ءونىمنىڭ شىعىمدىلىعى 800 سەنتنەردەن اينالۋى دا عاجاپ ەمەس. ءوز كەزەگىندە وبلىس باسشىسى ا.باتالوۆ اقسۋ اۋدانىنىڭ يرريگاسيالىق جۇيەلەرى تولىق جوندەلىپ بىتكەننەن كەيىن شارۋالار ەگىس القابى اينالىمىن كوبەيتۋگە مۇمكىندىك الاتىنىن اتاپ ءوتتى.
ەسكە سالساق، قازىرگى كەزدە قىزىلاعاش سۋ قويماسىن قالپىنا كەلتىرۋ جۇمىستارى ءجۇرىپ جاتىر. اتالمىش نىسان ىسكە قوسىلعاندا اۋدان يگىلىگىنە تاعى 7 مىڭ گەكتار سۋارمالى جەر اينالىمعا ەنگىزىلەتىن بولادى. سونىمەن قاتار اقسۋ اۋدانىنىڭ يرريگاسيالىق جۇيەلەرىن جوندەۋگە بيىلعى جىلدىڭ وزىندە 5،9 ملرد. تەڭگە ءبولىنىپ وتىر. جوندەۋ جۇمىستارىنىڭ ناتيجەسىندە اقسۋلىق شارۋالاردىڭ قانت قىزىلشاسىمەن قاتار باسقا دا داقىلدار سەبەتىن القاپتارىنىڭ اۋماعىن كەڭەيتۋگە مۇمكىندىك تۋماق.
