Sharyn shatqalynda ekotýrizm damyp, jańa vizit-ortalyq ashyldy,- dep habarlaidy Dalanews.kz
Sharyn shatqalyna saiahat endi burynǵydan da qolaily ári ekologiialyq turǵyda taza bola tústi. «Sharyn» vizit-ortalyǵy esigin aiqara ashyp, qonaqtardy zamanaýi servispen qarsy alyp jatyr. Endi týrister shatqaldy golf-karmen aralap, kásibi nusqaýshylardyń súiemeldeýimen tabiǵattyń erekshe sulýlyǵyn tamashalai alady.
Tabiǵatty qorǵaý baǵytyndaǵy mańyzdy jobalardyń biri – «Jasyl damý» AQ-men birlesken pilottyq joba. Onyń maqsaty – ekologiialyq mádenietti arttyrý jáne «taza týrizm» qaǵidasyn qalyptastyrý.
Osy joba aiasynda park aýmaǵynda qoqysty suryptap jinaý júiesi engizildi. Arnaiy qoqys jáshikteri, konteinerler jáne fandomat qurylǵysy ornatylyp, jinalǵan qaldyqtar qaita óńdeýge jiberilýde. Sondai-aq, týristerge bioydyraǵysh qapshyqtar taratylyp, ekologiialyq aqparattyq taqtalar ornatyldy.
Parktegi infraqurylym da birtindep jańaryp keledi. 2023 jyly Sharyn shatqalyndaǵy Baqylaý ótkizý pýnkti (BÓP) tolyq avtomattandyrylyp, 8 beinebaqylaý kamerasy jáne avtokólik nómirlerin anyqtaityn 2 kamera ornatyldy. Qazir parkke kirip-shyǵý avtomatty shlagbaým arqyly júzege asady, al tólem jasaý úshin KASPI QR júiesi engizildi. Sharyn shatqalyna uiymdastyrylǵan baspasóz týry barysynda jýrnalister ekologiialyq bastamany qoldap, shatqal aýmaǵynda bozarsha ósimdiginiń tuqymyn seýip, tabiǵatty saqtaýǵa óz úlesterin qosty.
Sondai-aq, vizit-ortalyq aýmaǵynda jas kóshetter otyrǵyzylyp, ulttyq parktiń jasyl jelegin kóbeitýge baǵyttalǵan shara júzege asyryldy. Búginde Ulttyq park aýmaǵynda jyl boiy jumys isteitin tórt týristik baǵyt bar. Kelýshilerge yńǵaily bolýy úshin arnaiy demalys oryndary, kerýen alańdary, aqparattyq stellalar men grottar ornatylǵan. Barlyq osy bastamalar ekotýrizmdi damytýǵa jáne tabiǵatymyzdy saqtaýǵa baǵyttalǵan úlken qadam bolyp otyr.
