2025 jyly 4 shildede Almatyda China Eastern Airlines áýe kompaniiasynyń Shanhai – Almaty baǵytyndaǵy jańa tikelei reisi iske qosylady, - dep habarlaidy Dalanews.kz Almaty týrizm basqarmasyna silteme jasap.
Alǵashqy reis arqyly qalaǵa áýe kompaniia ókilderi, Qytaidyń BAQ ókilderi men blogerleri kelmek. Bul joba Qytaida keńinen nasihattalyp, Almatynyń tanymaldylyǵyn arttyrýǵa sep bolmaq. Is-sharaǵa orai qalanyń týrizm basqarmasy «Almatynyń simvoly syilyqqa» aktsiiasyn uiymdastyryp, shaharǵa ushyp kelgen jolaýshylardy estelik kádesyimen qarsy alýdy josparlap otyr.
Jańa áýe baǵyty Almaty ákimdigi men China Eastern Airlines basshylyǵy arasyndaǵy 2025 jyldyń aqpan aiynda jasalǵan kelisimderdiń nátijesinde júzege asqan. Aita ketý kerek, bul kompaniianyń Ortalyq Aziiaǵa alǵashqy reisi.
Jańa baǵyttyń iske qosylýy qalany qytailyq týrister men biznes ókilderi úshin burynǵydan da qoljetimdi ete túspek. 2025 jyly alǵashqy toqsanynda Almatyǵa QHR-nan kelgen týrister sany 20,9 myńnan asyp, ótken jyldyń osy kezeńimen salystyrǵanda 39,9% ósken.
Búginde Almatydan Beijiń, Gýanchjoý, Sian, Úrimji, Hanchjoý jáne Saniaǵa tikelei áýe qatynasy bar. Jańa reis osy baǵyttardy tolyqtyryp, eki el arasyndaǵy áýe qatynasynyń jiiligin arttyrady. Qazirgi tańda bul kórsetkish aiyna 150 reisten asady.
