Almaty oblysyndaǵy oqýshynyń ólimine qatysty tyń derekter aityldy, dep habarlaidy Dalanews.kz.
"KTK" málimetinshe, kottedj jaldap, kóńil kótergen túlekterdiń qasynda eresekterden eshkim bolmaǵan. Bul týraly marqum Álibi Qadyrdyń ájesi aitqan. Úiindegi jalǵyz uldy olar jer qoinyna tapsyrǵan. Al oǵan káýap pisiretin temirdi suǵyp alǵan synyptasy qamaýǵa alyndy.
Qyrǵaýyldy aýylyndaǵy orta mektep túlekterine sońǵy qońyraý ótken jumada soǵylǵan. Qos synyptyń oqýshylary muny atap ótpek bolypty. Alaida jastardyń basqosýy bir otbasynyń jalǵyz ulynyń ólimimen aiaqtaldy.
"Úidiń aýlasynda sol kúnnen qalǵan mangal, sýsyn men ydys-aiaq áli de jatyr. Dastarhanda ishimdik te bolǵan kórinedi. Sodan túlekterdiń biri qatty mas bolypty. Keshte ol ashýlanyp, káýap pisirýge arnalǵan temirdi ári-beri sermeýge kirisipti. Al 17 jastaǵy Álibi qyzdardyń birin qorǵap, ashýly jigitti sabyrǵa shaqyrmaq bolǵan. Sol sátte synyptasy qolyndaǵy temirdi onyń júrek tusyna suǵyp alypty", - dep jazylǵan telearna málimetinde.
"Kottedjge barǵan. Qasyna eshkim barmaǵan, muǵalimderden de, ata-analardan da barmaǵan. Dalada shý shyqqan kezde bul shyqqan. Eshqandai bala qalmaǵan deidi, bári bytyrap jan‑jaqqa ketken. Bul men ony kóndireiin, áiteýir qatar júrgen bala ǵoi, birge júrgen, kóner degen ǵoi. Sol kezde júrek tusynan tyqqan. Júrek tusynan tyǵyp, qaityp sýyryp alǵan deidi", - dedi marqumnyń naǵashy ájesi Aidarkúl Qydyrova.
Túlekter dereý jedel járdem shaqyrǵan. Alaida olar kelgenshe jigit kóz jumypty. Qyrǵaýyldy aýylyndaǵy orta mektep ákimshiligi oqýshylardyń kottedj jaldap, sońǵy qońyraýdy toilamaq bolǵanyn "múldem bilmedik" dep otyr. Synyp jetekshisi de beihabar kórinedi.
"Synyp jetekshileri de bilmeidi, mektep ákimshiligi de bilmeidi. Úidi kim jaldap, qalai, ne bolǵanyn - ondai aqparat bizde joq. Ol kisiler qolhat jazyp berdi. Jinalys ótkizdik. Barlyǵynda aityldy. "Joq jibermeimiz, eshqaida barmaidy, balalar úide otyrady" dedi, úide otyr dep te aitty, sol kúni", - deidi Qyrǵaýyldy aýylyndaǵy qazaq orta mektebiniń direktory Perizat Ábdibaeva.
Qazir bul qandy oqiǵaǵa qatysty qylmystyq is qozǵalyp, tergeý júrip jatyr. Al kúdikti qamaýǵa alynǵan. Onyń ata-anasy da ákimshilik jaýapqa tartyldy.
Qyrshynnan qiylǵan Álibi Qadyr úiiniń úlkeni ári jalǵyz uly eken.
