الماتى وبلىسىنداعى وقۋشىنىڭ ولىمىنە قاتىستى تىڭ دەرەكتەر ايتىلدى، دەپ حابارلايدى Dalanews.kz.
"كتك" مالىمەتىنشە، كوتتەدج جالداپ، كوڭىل كوتەرگەن تۇلەكتەردىڭ قاسىندا ەرەسەكتەردەن ەشكىم بولماعان. بۇل تۋرالى مارقۇم ءالىبي قادىردىڭ اجەسى ايتقان. ۇيىندەگى جالعىز ۇلدى ولار جەر قوينىنا تاپسىرعان. ال وعان كاۋاپ پىسىرەتىن تەمىردى سۇعىپ العان سىنىپتاسى قاماۋعا الىندى.
قىرعاۋىلدى اۋىلىنداعى ورتا مەكتەپ تۇلەكتەرىنە سوڭعى قوڭىراۋ وتكەن جۇمادا سوعىلعان. قوس سىنىپتىڭ وقۋشىلارى مۇنى اتاپ وتپەك بولىپتى. الايدا جاستاردىڭ باسقوسۋى ءبىر وتباسىنىڭ جالعىز ۇلىنىڭ ولىمىمەن اياقتالدى.
"ءۇيدىڭ اۋلاسىندا سول كۇننەن قالعان مانگال، سۋسىن مەن ىدىس-اياق ءالى دە جاتىر. داستارحاندا ىشىمدىك تە بولعان كورىنەدى. سودان تۇلەكتەردىڭ ءبىرى قاتتى ماس بولىپتى. كەشتە ول اشۋلانىپ، كاۋاپ پىسىرۋگە ارنالعان تەمىردى ارى-بەرى سەرمەۋگە كىرىسىپتى. ال 17 جاستاعى ءالىبي قىزداردىڭ ءبىرىن قورعاپ، اشۋلى جىگىتتى سابىرعا شاقىرماق بولعان. سول ساتتە سىنىپتاسى قولىنداعى تەمىردى ونىڭ جۇرەك تۇسىنا سۇعىپ الىپتى"، - دەپ جازىلعان تەلەارنا مالىمەتىندە.
"كوتتەدجگە بارعان. قاسىنا ەشكىم بارماعان، مۇعالىمدەردەن دە، اتا-انالاردان دا بارماعان. دالادا شۋ شىققان كەزدە بۇل شىققان. ەشقانداي بالا قالماعان دەيدى، ءبارى بىتىراپ جان‑جاققا كەتكەن. بۇل مەن ونى كوندىرەيىن، ايتەۋىر قاتار جۇرگەن بالا عوي، بىرگە جۇرگەن، كونەر دەگەن عوي. سول كەزدە جۇرەك تۇسىنان تىققان. جۇرەك تۇسىنان تىعىپ، قايتىپ سۋىرىپ العان دەيدى"، - دەدى مارقۇمنىڭ ناعاشى اجەسى ايداركۇل قىدىروۆا.
تۇلەكتەر دەرەۋ جەدەل جاردەم شاقىرعان. الايدا ولار كەلگەنشە جىگىت كوز جۇمىپتى. قىرعاۋىلدى اۋىلىنداعى ورتا مەكتەپ اكىمشىلىگى وقۋشىلاردىڭ كوتتەدج جالداپ، سوڭعى قوڭىراۋدى تويلاماق بولعانىن "مۇلدەم بىلمەدىك" دەپ وتىر. سىنىپ جەتەكشىسى دە بەيحابار كورىنەدى.
"سىنىپ جەتەكشىلەرى دە بىلمەيدى، مەكتەپ اكىمشىلىگى دە بىلمەيدى. ءۇيدى كىم جالداپ، قالاي، نە بولعانىن - ونداي اقپارات بىزدە جوق. ول كىسىلەر قولحات جازىپ بەردى. جينالىس وتكىزدىك. بارلىعىندا ايتىلدى. "جوق جىبەرمەيمىز، ەشقايدا بارمايدى، بالالار ۇيدە وتىرادى" دەدى، ۇيدە وتىر دەپ تە ايتتى، سول كۇنى"، - دەيدى قىرعاۋىلدى اۋىلىنداعى قازاق ورتا مەكتەبىنىڭ ديرەكتورى پەريزات ابدىبايەۆا.
ءقازىر بۇل قاندى وقيعاعا قاتىستى قىلمىستىق ءىس قوزعالىپ، تەرگەۋ ءجۇرىپ جاتىر. ال كۇدىكتى قاماۋعا الىنعان. ونىڭ اتا-اناسى دا اكىمشىلىك جاۋاپقا تارتىلدى.
قىرشىننان قيىلعان ءالىبي قادىر ءۇيىنىڭ ۇلكەنى ءارى جالعىز ۇلى ەكەن.
