Almaty oblystyq densaýlyq saqtaý basqarmasy Qarasai aýdany Shamalǵan aýylyndaǵy Aqseńgir – Shamalǵan ótkelinde jolaýshy poiyzy men avtobýstyń qaqtyǵysýy saldarynan zardap shekken úsh adamnyń densaýlyq jaǵdaiy týraly jańa málimetterdi usyndy, - dep habarlaidy Almaty oblysy ákiminiń baspasóz qyzmeti.
Belgili bolǵandai, Qarasai aýdandyq ortalyq aýrýhananyń bazasynda Almaty aimaqtyq balalar klinikalyq aýrýhanasy men Almaty qalalyq № 1 klinikalyq aýrýhananyń dárigerleri zardap shekken 2014 jylǵy qyz balaǵa operatsiia jasady, ázirge balanyń jaǵdaiy aýyr.
Al 2016 jylǵy búldirshinniń densaýlyq jaǵdaiy óte aýyr dep baǵalanyp otyr. Eki patsient te komada, jasandy demaldyrý apparattary qosylǵan. Al analarynyń jaǵdaiy turaqty aýyr.
Zardap shekkenderge meditsinalyq kómekti jumyldyrý úshin Almaty oblysy men Almaty qalasyndaǵy bilikti mamandar tartyldy.
Olar - Almaty aimaqtyq balalar klinikalyq aýrýhanasynyń, Almaty kópsalaly klinikalyq aýrýhanasynyń, Almaty qalalyq № 1 klinikalyq aýrýhanasynyń balalar jáne úlkender neirohirýrgtary, travmatologtary men reanimatologtary. Zardap shekkenderge barlyq qajetti meditsinalyq kómekter kórsetilýde.
Jaǵdai oblys ákiminiń jeke baqylaýyna alynǵan, patsientter jaǵdaiy týraly saǵat saiyn habarlanyp otyr.
Eske salsaq, 15 qyrkúiek kúni keshki saǵat jetiler shamasynda «Almaty - Qostanai» baǵytyndaǵy № 43 jolaýshylar poiyzy men «Almaty - Qaskeleń» baǵytyndaǵy «Setra» markaly avtobýs soqtyǵysyp, sonyń saldarynan avtobýs júrgizýshisi mert bolyp, 3 jolaýshy - 1986 jylǵy áiel adam men onyń 2014 jáne 2016 jyly týǵan balalary zardap shekken.
Avtobýsta jalpy sany 67 adam bolǵan. Soqtyǵysý oqiǵasy boiynsha qylmystyq is qozǵaldy.
