Qyzylorda oblysynan dinozavrdyń súiegi tabyldy, dep habarlaidy Dalanews.kz 24kz-ke silteme jasap.
Telearna málimetinshe, oblystyq tarihi-ólketaný mýzeiiniń mamandary qundy jádiger sonaý Bor dáýirinde mekendegen tirshilik iesiniń qańqasy bolýy múmkin degen boljam jasap otyr. Ekspeditsiia Qarmaqshy aýdanynyń ortalyǵynan soltústikke qarai 90 shaqyrym jerde júrgizilgen. Bul mańdy ǵalymdar Shah-Shah shatqaly dep ataidy.
Aldaǵy ýaqytta tabylǵan buiymdar naqtylaý úshin paleontologtarǵa joldanbaq. Mýzeidiń ǵylymi hatshysy Ashat Sailaýdyń aitýynsha, 1968 jyly dál osy aýmaqtan "Aralozavr" degen ataýmen ǵylymi ainalymǵa engen dinozavrdyń bas súiegi tabylǵan.
"Qazaqstanda paleontologiialyq keshender óte sanaýly. Sondyqtan keshegi tabylǵan jádigerlerdiń kóbi - baǵa jetpes qundy jádigerler. Aldaǵy ýaqytta paleontologtarmen jumys isteimiz. Bul úlken sensatsiialyq jańalyq bolyp tur. Jalpy keleshekte bul jer - týristik nysanǵa ainaldyrýǵa tiisti jerlerdiń biri", - dedi tarihi-ólketaný mýzeiiniń ǵylymi hatshysy Ashat Sailaý.
