Saiasattanýshy Erbol Edilov Qazaqstanda eki palataly júieden bir palataly Parlamentke kóshý bastamasyna qatysty pikir bildirdi. Onyń aitýynsha, bul reforma el úshin de, qoǵam úshin de mańyzdy múmkindiktermen qatar belgili bir táýekelderge de ákelýi múmkin, dep habarlaidy Dalanews.kz.
Edilovtiń sózinshe, eń aldymen zań shyǵarý protsesi jedeldeidi.
"Qazir zańdar Májilis pen Senat arasynda kidirip qalady. Bir deńgeili júie reformalardy jyldamdatýǵa múmkindik beredi", – dedi ol.
Sonymen qatar, Senatty ustaý shyǵyny azaiady, al Parlament kásibi ári keń quzyretti bolýy tiis.
Saiasattanýshy sondai-aq Prezidenttiń jańa Parlamentti tek partiialyq tizimder boiynsha sailaý usynysyna toqtaldy. Onyń pikirinshe, bul sheshim qai partiia naqty jaýapty ekenin aiqyndap, saiasi júieniń ashyqtyǵyn arttyrady.
Sonymen qatar synshylardyń alańdaýshylyǵy bar. Olardyń oiynsha, Senat joiylsa, óńirlerdiń múddesi tolyq eskerilmei qalýy múmkin, al álsiz partiialyq júie jaǵdaiynda Parlament atqarýshy bilikke táýeldi bolyp ketý qaýpi bar.
"Bul qaýipterdi joqqa shyǵarýǵa bolmaidy. Sondyqtan jańa zańdy jan-jaqty talqylap, qoǵamdy, sarapshylardy, azamattyq belsendilerdi keńinen tartý qajet", – dedi Edilov.
Onyń pikirinshe, eń mańyzdysy – halyqtyń senimi men qatysýy.
"Parlament reformasy – jai tehnikalyq ózgeris emes, ol azamattardyń basqarýǵa shyn máninde aralasýyna jol ashýy tiis. Eger qoǵam shet qalsa, reforma "qaǵaz júzinde" qalyp qoiýy múmkin", – dep túiindedi saiasattanýshy.
