Senator Maqtaaral Joldaýdy nasihattady
Jiynǵa Maqtaaral aýdanynyń ákimi Baqyt Asanov, aýdandyq máslihattyń hatshysy Qadir Sársekbaev, ardagerler keńesiniń tóraǵasy men músheleri, aýdandyq máslihat depýttary jáne BAQ ókilderi qatysty.
Alǵash bop sóz alǵan Álimjan Seitjanuly jańadan qurylǵan Maqtaaral aýdanynyń halqyna qutty bolsyn aityp, Elbasynyń Joldaýyndaǵy negizgi baǵyttarǵa jeke-jeke toqtalyp, keń kólemde baiandama jasady.
– Elbasymyzdyń Qazaqstan halqyna arnaǵan biylǵy Joldaýy merzimi men maǵynasy, salmaǵy jaǵynan da ózgeshe boldy. Bul joly Prezidentimiz Qazaqstandyqtardyń ál-aýqaty, eń aldymen tabystarynyń turaqty ósimi men turmys sapasyna bailanysty bolatynyn alǵa tartty. Birinshi kezekte Elbasy halyq tabysynyń ósýine mán berdi. Osy rette Elbasymyz Úkimetke 2019 jyldyń 1 qańtarynan bastap eń tómengi jalaqyny 1,5 ese, iaǵni 28 myńnan 42 myńǵa deiin ósirýdi tapsyrdy, – dedi Álimjan Seitjanuly.
Senat depýtaty Joldaýda aitylǵan turmys sapasyn arttyrý, ómir súrýge jaily orta qalyptastyrý, azamattar suranysyna beiimdelgen memlekettik apparat qurý, tiimdi syrtqy saiasat, árbir qazaqstandyqtyń elimizdegi ózgerister úderisine atsalysýy máseleleri boiynsha naqty mysaldarmen, jan-jaqty taldai otyryp túsinikteme berdi.
Kezdesýde sóz alǵan Maqtaaral aýdanynyń qurmetti azamaty Qasymhan Hametov jańadan qurylǵan aýdanǵa arnaiy kelgen senatorǵa alǵysyn bildirip, biylǵy Joldaýda aitylǵan basym baǵyttardy oryndaý úshin atqarýshy organdar sergek jumys jasaý kerektigin tilge tiek etti.
Sondai-aq, aýdandyq máslihattyń depýtaty, akademik Ibadýlla Úmbetaev Joldaýdaǵy aýyl sharýashylyǵy máselelerine toqtalyp, atalǵan salada 2 ese paida tabý úshin álemniń úzdik tehnologiialaryn jergilikti jerge beiimdep engizý kerektigin jetkizdi.
Aýdandyq máslihattyń taǵy bir depýtaty Berik Shampiev aýyl sharýashylyǵy salasyndaǵy maqtaǵa beriletin sýbsidiianyń kólemin ulǵaitý boiynsha usynys berdi. Sondai-aq, aýdandyq máslihattyń hatshysy Qadir Sársekbaev kúzde jáne kóktemde beriletin janar jaǵarmaidyń merzimin ózgertý boiynsha másele kóterdi.
Aýdannyń ardageri Perdesh Esenbekov oblys ortalyǵy Shymkent qalasynan Túrkistan qalasyna aýysqaly Maqtaaral eń shalǵai aýdan bolǵanyn, jańa aýdanda aýyl sharýashylyǵy ónimderin syrtqa jóneltý úshin temir jol men áýejai qajettiligin alǵa tartty. Sondai-aq, avtojoldardyń sapasyn jaqsartý kerektigin de atap ótti.
Jiyndy qorytyndylaǵan aýdan ákimi B.Asanov jańa Maqtaaralda kezek kútip turǵan máseleler kóptigin, aýdan ákimdigi tarapynan jasalyp jatqan jobalardy júzege asyrý úshin keler jyldan bastap oblystyq jáne respýblikalyq biýdjetten qarjylardyń tolyq berilýine yqpal jasaýdy surady.
Maqtaaral aýdany ákiminiń baspasóz qyzmeti
