Senat Ystyqkól oblysyndaǵy nysandarǵa qatysty kelisimderdi ratıfıkasıalady, dep habarlaıdy Dala News.

«Senat Ystyqkól oblysyndaǵy jer ýchaskelerin jalǵa berý týraly shart pen menshik quqyǵyn retteý jónindegi kelisimdi ratıfıkasıalady. Qujattar Qyrǵyz Respýblıkasynyń aýmaǵyndaǵy qazaqstandyq kýrorttyq-rekreasıalyq nysandardyń jumys isteýi úshin biryńǵaı quqyqtyq negiz qalyptastyrady», – dep habarlady Senat.

Qujattarǵa sáıkes, Qazaqstanǵa tórt nysanǵa menshik quqyǵy bekitildi: bir shıpajaı, eki demalys úıi jáne bir sporttyq-saýyqtyrý bazasy. Jer telimderi 49 jyl merzimge jalǵa beriledi.

«Qyrǵyz tarapy nysandardy alyp qoıý boıynsha sharalar qabyldanbaıtynyna kepildik beredi, olardyń paıdalanylýy qatań túrde maqsatty taǵaıyndaý boıynsha júzege asyrylady», – dep túsindirildi Senatta.

Sonymen qatar shıpajaı men demalys úılerin 3–4 juldyzdy qonaqúı deńgeıine deıin jańǵyrtý mindettemeleri (sporttyq bazaǵa qatysty emes) uzartyldy.

Osylaısha, Ystyqkóldegi qazaqstandyq nysandardyń quqyqtyq mártebesi tolyq bekitildi.