Senat otyrysynda depýtat Súiindik Aldashev premer-ministr Oljas Bektenovke joldaǵan saýalynda azamattyq aviatsiia salasyndaǵy birqatar mańyzdy máseleni kóterip, naqty sheshimder usyndy. Ol Memleket basshysy Qasym-Jomart Toqaevtyń aviaotyn baǵasyn tómendetý týraly tapsyrmasyn eske saldy, dep habarlaidy Dalanews.kz.
Negizgi máseleler
Aviaotynnyń tapshylyǵy:
2024 jyly Qazaqstanda 746 myń tonna aviaotyn óndirilgen, al suranys 971 myń tonna bolǵan. Bul – 237 myń tonna nemese 25% tapshylyq. 2030 jylǵa qarai bul kórsetkish 550 myń tonnaǵa jetýi múmkin.
Baǵanyń joǵary bolýy:
Aviaotyn bilet baǵasynyń 36,5%-yn quraidy. Áýejailar otyndy basqa jetkizýshilerge qaraǵanda 15-20% qymbatqa satady, tabystylyǵy keide 60%-ǵa deiin jetedi. Bul jaǵdai tranzittik áleýettiń tómendeýine áser etip otyr: sońǵy 5 jylda sheteldik reister sany 58%-ǵa, al júk tasymaly 36%-ǵa azaiǵan.
Áýejailardyń jaǵdaiy:
Birqatar óńirlerde infraqurylym apatty kúide. Jerústi qyzmet kórsetý eski. Tarifter 2014 jyldan beri qaita qaralmaǵan.
Kadr jetispeýshiligi:
Salada bilikti mamandar tapshy. Júieli daiyndyq jolǵa qoiylmaǵan.
Retteý men ashyqtyqtyń joqtyǵy:
Aviaotynnyń baǵasy qalai qalyptasatyny belgisiz. Bul salada birtutas kózqaras pen baqylaý tetigi joq.
Senatordyń úkimetke usynystary
Azamattyq aviatsiiany basqarýdyń tiimdi úlgisin ázirleý;
Munai óńdeý zaýyttaryndaǵy óndiristi arttyrý;
Aviaotyndy ádil baǵamen usynýdyń biryńǵai júiesin jasaý;
Áýejailardyń beiindi emes qyzmetterge alańdamaýyn qadaǵalaý;
Salaǵa investitsiia tartýdy kúsheitý;
Investorlarǵa yńǵaily jaǵdai jasaý;
Aviatsiia mamandaryn daiyndaý júiesin jetildirý.
Senatordyń aitýynsha, bul máseleler uzaq jyldar boiy sheshilmei keledi jáne eger der kezinde shara qoldanylmasa, azamattyq aviatsiiada júieli táýekelder týyndaýy múmkin.
