Senat depýtattary Birikken Ulttar Uiymynyń mamandandyrylǵan mekemeleriniń artyqshylyqtary men immýnitetteri týraly konventsiiaǵa qatysty Qazaqstannyń buryn engizgen eskertpeleri men málimdemelerin alyp tastaý týraly zańdy maquldady, dep habarlaidy dalanews.kz.
Qujat Memleket basshysynyń qol qoiýyna jiberildi.
Senattyń túsindirýinshe, zań Qazaqstan úshin 1947 jylǵy 21 qarashada qabyldanǵan BUU-nyń Mamandandyrylǵan mekemelerdiń artyqshylyqtary men immýnitetteri týraly konventsiiasynyń tolyq kólemde kúshine enýin qamtamasyz etý maqsatynda ázirlengen.
Atalǵan konventsiiany Qazaqstan 2020 jyly ratifikatsiialaǵan bolatyn. Alaida sol kezde el tarapynan birqatar eskertýler men shekteýler engizilgen. Atap aitqanda, bul eskertýler BUU mamandandyrylǵan mekemelerinde jumys isteitin Qazaqstan azamattaryna beriletin keibir artyqshylyqtardy shektep, sondai-aq kedendik jeńildikterdiń qoldanylý aiasyn taryltqan.
Senattyń Halyqaralyq qatynastar, qorǵanys jáne qaýipsizdik komitetiniń qorytyndysynda bul týraly:
«Konventsiia 2020 jylǵy 21 mamyrdaǵy Qazaqstan Respýblikasynyń Zańymen belgili bir eskertýlermen ratifikatsiialanǵan bolatyn. Eskertýler BUU mekemeleriniń qyzmetkerleri bolyp tabylatyn Qazaqstan azamattarynyń artyqshylyqtaryn shekteidi, al málimdeme Konventsiiada kózdelgen kedendik jeńildikterdiń kólemin ulttyq zańnama sheńberinde taryltady», – dep kórsetilgen.
Senator Amangeldi Nuǵmanovtyń aitýynsha, Qazaqstan Konventsiiaǵa qosylǵannan keiin BUU júiesindegi mamandandyrylǵan mekemelermen konsýltatsiialar júrgizilgen.
Nátijesinde halyqaralyq uiymdar Qazaqstan engizgen shekteýler Konventsiianyń negizgi qaǵidattaryna áser etetinin málimdegen.
«Ótkizilgen konsýltatsiialar qorytyndysy boiynsha mamandandyrylǵan mekemelerdiń edáýir bóligi bul eskertýlerdiń qolailylyǵyna kúmán keltirdi. Olar atalǵan normalar mamandandyrylǵan mekemeler laýazymdy tulǵalarynyń mártebesine, sondai-aq beriletin artyqshylyqtar men immýnitetterdiń negizgi elementterine qatysty ekenin atap ótti. Osyǵan bailanysty Birikken Ulttar Uiymynyń Quqyqtyq máseleler jónindegi basqarmasy Qazaqstan Respýblikasyna Konventsiianyń tolyq kúshine enýin qamtamasyz etý úshin atalǵan eskertýler men málimdemelerdi qaitaryp alý máselesin qarastyrýdy usyndy», – dedi senator.
Osyǵan bailanysty zań jobasynda Qazaqstannyń Konventsiianyń VI babyndaǵy 19-bólimniń c), d) jáne e) tarmaqtaryna qatysty engizgen eskertýlerin, sondai-aq III baptyń 9-bólimindegi b) jáne c) tarmaqtaryna qatysty jasaǵan málimdemesin alyp tastaý kózdelgen.
Senatorlardyń aitýynsha, bul sheshim Qazaqstannyń halyqaralyq mindettemelerin tolyq oryndaýyna múmkindik beredi.
«Zańdy qabyldaý Qazaqstan Respýblikasynyń Konventsiiaǵa tolyqqandy qatysýy úshin qajetti ishki memlekettik rásimderdi aiaqtaýǵa, onyń erejelerin tolyq kólemde qoldanýdy qamtamasyz etýge, sondai-aq Qazaqstannyń Birikken Ulttar Uiymynyń mamandandyrylǵan mekemelerimen yntymaqtastyǵyn odan ári nyǵaitýǵa yqpal etedi», – dedi Amangeldi Nuǵmanov.
Zań jobasyn talqylaý barysynda Syrtqy ister ministriniń birinshi orynbasary Erjan Ashyqbaev BUU qyzmetkerlerine beriletin immýnitetter absoliýtti sipatqa ie emes ekenin atap ótti.
Onyń sózinshe, mundai artyqshylyqtar men immýnitetter halyqaralyq uiym qyzmetkerleriniń jeke basyn qorǵaý úshin emes, olardyń qyzmettik mindetterin táýelsiz atqarýyna jaǵdai jasaý úshin beriledi.
«Áńgime artyqshylyqtar men immýnitetterdiń fýnktsionaldyq sipatta bolýynda. Olar tek qyzmettik mindetterdi oryndaý kezinde jasalǵan áreketterge ǵana qoldanylady. Sonymen qatar quqyq buzýshylyq anyqtalǵan jaǵdaida Konventsiianyń 22-bólimi mamandandyrylǵan mekemelerdi immýnitetten bas tartý máselesin qarastyrýǵa jáne tiisinshe sot tóreliginiń júzege asyrylýyna múmkindik berýge mindetteidi. Kepildikter osy turǵydan qarastyrylǵan», – dedi Erjan Ashyqbaev.
Aita keteiik, buǵan deiin Senat Qazaqstanda Ortalyq Aziia men Aýǵanstan elderi úshin BUU-nyń Turaqty damý maqsattary jónindegi óńirlik ortalyǵyn qurý týraly kelisimdi de ratifikatsiialaǵan bolatyn.
