Senat arnaiy memlekettik organdardyń qyzmetine qatysty zańnamalyq túzetýlerdi qabyldady, dep habarlaidy dalanews.kz.
Qujat qyzmet ótkerý tártibin jetildirýge, qyzmetkerlerdiń áleýmettik qorǵalýyn kúsheitýge jáne arnaiy memlekettik organdar jumysynyń tiimdiligin arttyrýǵa baǵyttalǵan.
Zań aiasynda quqyq qorǵaý, arnaiy memlekettik organdar, azamattyq qorǵaý organdary, memlekettik feldegerlik qyzmet jáne áskeri qyzmetshiler úshin zeinetaqymen qamsyzdandyrý tártibi naqtylandy. Endi qyzmet ótkerý merzimi keminde 25 jyldy quraityn jáne qyzmette bolýdyń shekti jasyna jetýine bailanysty jumystan bosatylǵan azamattar eńbek sińirgen jyldary úshin zeinetaqy tólemderin alý quqyǵyn saqtaidy.
Sondai-aq kúshtik qurylymdar arasyndaǵy kadrlyq aýysý rásimi jeńildetildi. Túzetýlerge sáikes quqyq qorǵaý organdarynyń qyzmetkerleri arnaiy memlekettik organdarǵa nemese Qarýly kúshter qataryna qyzmet ótilin úzbei aýysa alady. Bul tártip keri baǵytta da qoldanylady.
Zańda shetelge qyzmettik issaparmen nemese halyqaralyq uiymdarǵa jiberiletin arnaiy memlekettik organdar qyzmetkerleriniń áleýmettik kepildikteri keńeitilgen. Olar diplomatiialyq qyzmetkerlerge teńestirilgen sharttarmen qamtamasyz etiledi. Bul áleýmettik jáne meditsinalyq qyzmet kórsetý máselelerinde olardyń otbasy múshelerine de qatysty bolady.
Qujatpen Memlekettik kúzet qyzmetiniń ókilettikteri de naqtylandy. Vedomstvoǵa óz mindetterin oryndaý úshin memlekettik organdardyń múlkin paidalaný, jaýyngerlik tehnikamen qatar ózge de tehnikalyq quraldardy jáne qyzmettik janýarlardy qoldaný quqyǵy beriledi.
Sonymen qatar terrorizm men ekstremizmge qarsy is-qimyl salasyndaǵy normalar kúsheitildi. Zańda terroristik jáne ekstremistik materialdardy saqtaýǵa tyiym salynyp, memlekettik organdardyń osy baǵyttaǵy ókilettikteri naqtylandy.
Memlekettik qupiialardy qorǵaýǵa qatysty talaptar da kúsheitildi. Qupiia aqparattyń qorǵalý deńgeiin tómendetý ulttyq qaýipsizdikke tónetin qater retinde belgilendi. Budan bólek, prezidenttik bailanys júiesine qatysty málimetter memlekettik qupiialar qataryna engizildi.
Túzetýler vedomstvolyq joǵary oqý oryndaryna qabyldaý tártibine de áser etedi. Upailary teń bolǵan jaǵdaida jetim balalarǵa, qyzmet ardagerleriniń balalaryna, «Altyn belgi» iegerlerine jáne halyqaralyq olimpiadalardyń jeńimpazdaryna basymdyq beriledi.
Sondai-aq áskeri qyzmetshilerdiń qyzmettik mindetterin oryndaý mártebesi naqtylandy. Endi daǵdarystyq jaǵdailar, tótenshe rejimder nemese jumyldyrý kezinde atqarylǵan mindetter de qyzmettik mindetterdi oryndaý retinde esepteledi.
