Osy rette ánge jany qumar bolashaq jaryq juldyzdardyń basyn qosyp, olarǵa syıqyrǵa toly sazdy áýennniń san túrli syrlaryn úıretken «STAR» vokaldyq stýdıasynyń atqarǵan jumysyn aıryqsha atap aıtýǵa bolady. Búginde stýdıa tálimgerleri qalalyq, oblystyq, respýblıkalyq án baıqaýlardy aıtpaǵanda, halyqaralyq saıystarda top jaryp júr. Jýyrda atalǵan stýdıanyń shákirtteri – Aıdana Jalelova, Altynıa Ǵazızova, Malıka Jantasova, Daıana Maqulbaevalar «Tańǵy Shuǵyla» shyǵarmashylyq festıvaliniń aıasynda ótkizilgen «Zımnıı zvezdopad» halyqaralyq saıysynda birqatar atalymdar boıynsha jeńiske jetip, bilim ordasynyń abyroıyn asqaqatatty.
– Kóptegen adamdar bizdiń mekteptiń ataýyna qarap oqýshylardy bilimmen ǵana qarýlandyrady dep oılap qalady. Bul jaıynda ara-tura estip qalamyn. Biz aldymyzǵa kelgen oqýshyǵa ozyq úlgidegi bilim berýmen qatar onyń tulǵalyq damýyna da erekshe nazar aýdaramyz. Mysaly, sońǵy 7 jyldan beri turaqty túrde jumys jasap kele jatqan «STAR» vokaldyq klýby talaı ánshiniń mektep qabyrǵasynda júrip-aq tanylýyna jol ashty. Al Óskemen qalasynda ótken bul saıysqa alǵash ret qatystyq. Soǵan qaramastan aıymyz ońynan týyp, júldeli oraldyq. Endigi meje – osy deńgeıden túspeý, – deıdi mýzykalyq kórkemdik jetekshi Rýslan Qasenov.
Án áleminde jańa talanttardyń tanylaýyna jol ashyp, mýzyka mádenıeti men óneriniń damýyn basshylyqqa alǵan halyqaralyq baıqaý 2 kúnge sozylyp, oǵan 3-50 jas aralyǵyndaǵy áýesqoı ánshiler qatysyp, sahnany naǵyz saıys alańyna aınaldyrǵan. Jas erekshelikterine qaraı birneshe topqa bólingen úmitkerler vokal, bı, akterlik sheberlik, aspaptaǵy shyǵarmashylyq, kórkem sýret, hor, kıim úlgileri atalymdary boıynsha aralaryndaǵy myqtylardy anyqtady.
Saıys sharty boıynsha shynaıy daýysta án shyrqaǵan semeılik ónerpazdardyń arasynan Aıdana Jalelova «Estradalyq vokal», Altynıa Ǵazızova «Klasıkalyq án», Malıka Jantasova «Zamanaýı vokal» atalymdary boıynsha Gran-prı júldegerleri atandy. Mektebimizdiń 8-shi synybynda oqıtyn ónerli qyzdar arnaıy maqtaý qaǵazy men Kýbokke ıe boldy. Al 7-shi synyp oqıtyn taǵy bir úmitkerimiz Daıana Maqulbaeva 10-12 jas aralyǵyndaǵy «Estradalyq vokal» atalymynda 1-shi orynǵa ıe bolyp, maqtaý qaǵazy men altyn medalmen marapattaldy. Osy daryndy balalardyń talantyn ushtap, shyǵarmashylyq tulǵany damytý salasyndaǵy tolaǵaı tabysy men qajyrly eńbegi úshin jetekshileri Rýslan Qasenov uıymdastyrýshylar tarapynan alǵys hat aldy. Biz úshin úlken maqtanysh.
Ejelden án men jyrǵa qumar, qazaq ádebıeti men mádenıetiniń kil myqtylary dúnıege kelgen qasıetti topyraqta olardyń izin jalǵastyrýshylardyń bizdiń aramyzdan shyǵýy zıatkerlik mektebimizdegi bilim men tárbıeniń qatar sátti júrgizilip kele jatqandyǵynyń kýásindeı.
Ermek ISABAEV, Semeı qalasyndaǵy fızıka-matematıka baǵytyndaǵy Nazarbaev Zıatkerlik mektebiniń baspasóz hatshysy.
